Brannvesenet kjem på heimebesøk

Cirka 40.000 husstandar over heile landet får 1.-3. desember besøk av lokale brannvesen, feiarvesen og el-tilsyn, med tilbod om gratis og uforpliktande sjekk av brann- og el-tryggleiken i bustaden.

Minst 41 prosent av bustadbrannane i Hordaland skuldast feil i el-anlegg eller feil bruk av elektriske utstyr. Det viser nye tal frå DSB for den siste tiårsperioden.

Dei tre største brannårsakene i Hordaland i perioden 2005-2014 er open eld med 27 prosent, feil bruk av elektrisk utstyr med 26 prosent og feil i el-anlegg med 15 prosent. I 15 prosent av brannane er årsaka ukjend. Det opplyser Fusa brann og redning og Fusa Kraftlag i ei pressemelding.

Brannfarleg månad

Desember er den mest brannfarlege månaden i året, og særleg perioden mellom jul og nyttår. Til no i år har to personar omkome i brann i Hordaland.

- Det er i stor grad personar som høyrer til risikoutsette grupper som mistar livet i brann. Særleg gjeld dette eldre menneske, og alle er ikkje i stand til å ta vare på eigen branntryggleik. Sjekk difor om dine nærmaste har røykvarslar som fungerer, og om dei har behov for ein komfyrvakt (med ein komfyrvakt slår komfyren seg av når det oppstår farlege situasjonar, journ.mrk.), seier brannsjef Gunnar Hatlelid frå Fusa Brann og redning og Tove Fosså frå Fusa Kraftlag.

Komfyren er den største enkeltårsaka til brann i Noreg.

- Så godt som alle komfyrbrannar skuldast menneskelege feil, og ikkje tekniske feil ved produktet. Ved å installere komfyrvakt, kan du hindra at komfyrbrannar oppstår. Alle bør installera komfyrvakt, oppmodar Fosså og Hatlelid.

Frivillig

Cirka 40.000 husstandar over heile landet får 1.-3. desember besøk av lokale brannvesen/feiarvesen og elektrisitetstilsyn, med tilbod om gratis og uforpliktande sjekk av brann- og eltryggleiken i bustaden. Besøka er ein del av brannvernkampanjen Aksjon bustadbrann.

- Det er ein enkel kontroll av branntryggleiken, med rettleiing og informasjon. For bebuarane er sjekken frivillig, og kontrollørane vil legitimera seg når dei ringjer på, seier Hatlelid og Fosså

Aksjonen er ein del av «Alt vi kan mot brann», som er ei nasjonal satsing fram til 2020 på brannførebyggjande arbeid målretta mot risikoutsette grupper.