Ein haust i humorens teikn

Oseana har booka ein humoristisk trio til haustprogrammet. I tillegg er det sett opp ekstraframsyning på Bjarte Hjelmelands lånte fjær.

- Hausten 2016 på Oseana blir ein haust i humoren sitt teikn, smiler arrangementssjef, Berit Steen.

Bjarte Hjelmeland kjem til Oseana i september med si suksessframsyning «I lånte fjær». Der er det allereie sett opp ei ekstraframsyning.

Rett før jul, 17. desember, får kunst- og kultursenteret besøk av trioen Raske Menn med deira siste show, «Nitti minutter på åtti minutter».

Dei har spelt for fulle hus på Latter i Oslo sidan premieren, og no skal dei ut på turné.

- Tittelen speglar jo eit show som held høgt tempo, men som er spekka av høgdepunkt, lokkar Steen.

All verdas tid

Stand up-komikaren Roar Brekke kjem til Oseana 21. oktober med sitt nyaste show «All verdens tid».

- Brekke er kjend for sin kombinasjon av verbal humor og fysiske innslag, og har evna til å treffe spikaren på hovudet i observasjonar av både meg, deg og seg sjølv, meiner Steen.

Roar Brekke vart nominert til Komiprisen for «All verdens tid», og arrangementssjefen har god tru på at dette vil falla i smak hos osingane.

Bergensbrasiliansk

I november kjem bergensarbrasilianaren Eduardo «Doddo» Andersen og vossingen Sjur Hjeltnes som saman "ser livet passera i revy".

Doddo er kjend som Brann-bloggar i Bergens Tidende, men er også ein habil musikar og komikar. I framsyninga «Doddo - ser livet passere i revy» har han med seg Sjur Hjeltnes som sidekick.

Hjeltnes har tidlegare vitja Os med framsyninga «200 år på to timar» med Linda Eide i 2014.

Regien er ved Doddo si kone, komikaren Christine Hope.