Heidi Tronsmo og Glenn Erik Haugland (Opera Omnia) møter forfattaren Øivind Hånes på Vedholmen galleri laurdag kveld.
Heidi Tronsmo og Glenn Erik Haugland (Opera Omnia) møter forfattaren Øivind Hånes på Vedholmen galleri laurdag kveld.

Maritim verdspremiere på Vedholmen Galleri

Abstrakte kunstverk, ramsalte dikt og blå tonar er nokre av ingrediensane når Vedholmen Galleri si nye utstilling opnar laurdag kveld.

Øystein Lid

ol@osogfusa.no

Artikkelen held fram under annonsen.

Det er når den mangeårige biletkunstnaren Line Hvoslef opnar ny separatutstilling på Vedholmen galleri at ein ny trio ser dagens lys, beståande av den prisbelønte forfattaren Øyvind Hånes og Opera Omnia. Bak artistnamnet skjuler det lokale artistparet Heidi Tronsmo og Glenn Erik Haugland seg, som driv Studio E39 og har ei rekkje suksessrike førestillingar på samvitet. Lokalt er HavFest den best kjende. Også denne gongen er det eit maritimt tema den nye trioen vil ta for seg.

Sparka igang av David Bowies død

Øivind Hånes, tusenkunstnaren som både har gjeve ut romanar, dikt, operamusikk, ballettmusikk, jazz - og kokebøker, stiller med rykande ferske dikt med maritime tema, men bidrar også musikalsk.

- Øivind er kanskje eit uskrive blad for mange osingar, men eg har kjent han i over 30 år. Han studerte musikk i Drammen, men søkte til vårt miljø i Oslo. Han har også bakgrunn frå New Wave-rocken, seier Haugland.

Kunstnaren Line Hvoslef opnar ny utstilling laurdag.
Kunstnaren Line Hvoslef opnar ny utstilling laurdag.

Dei har hatt sporadiske samarbeidsprosjekt opp gjennom, og no fann dei ut at tida var moden for å invitera Köln-baserte Hånes til Os.

- Etter at David Bowie døydde snakka eg med Øivind og sa; "eg har funne ut at livet ikkje varer evig". Viss dette skal bli noko av måtte me få ræva i gir, som det heiter i Os.

Instrumentalt blir det både klarinett, kontrabass og keyboard - medan alle tre bidreg som songarar.

Vedholmen - Ein fantastisk møteplass

Line Hvoslef har stilt ut i Os ein gong før - under festspela i mai 2012. Ho har ein stil som har blitt samanlikna med Gustav Klimt og Art Nouveau-stilen. Denne gongen er utstillinga kalla «Periskop» og består av store og små arbeid i olje på lerret og collage i blanda teknikk.

- Ho har litt science fiction-aktige bilete. Er det ein fisk? Eller er det eit romskip? Utrykket hennar er i slekt med måten eg jobbar på som komponist. Det er ei form for fantasering over nesten gjenkjennelege objekt frå røyndomen, forklarer Haugland.

Artikkelen held fram under annonsen.

- Kor mange er det plass til på Vedholmen Galleri?

- Det blir ofte fullt. Det blir litt som "sardinar i ein boks" for å halda oss til maritime metaforar - ein blir godt kjent. Det er ganske flott at me har fått ein slik møtestad i Os. Trass i at Vedholmen Galleri aldri har fått noko offentleg støtte, er dette eit av dei mest aktive visningsstadene i Hordaland, seier Haugland.