Mest høglytte og største fotballskulegjeng
Det er mange år sidan så mange fotballskuleelevar har vore samla på Kuventræ. Heile 158 elevar deltok på Hassan El Fakiris fotballskule denne veka.
- Me har nok vore bortimot 200 for ein del år sidan, men dei siste åra har me sett tak på kring 120, seier Leif Idar Røen i Os Turn fotball.
Den desidert største fotballskulen i Os hadde nett hatt vitjing av Brann-spelarane Kasper Skaanes og Fredrik Heggland, då «Os og Fusaposten» var oppom onsdag. Då var gjengen meir enn klare for å bli tekne bilete av, både i grupper og eine og åleine.
Artikkelen held fram under annonsen.
Norway Cup ligth
Men før me fekk samla elevane måtte dei få seg ein pust i bakken og noko å eta.
- Me hadde litt styr med å få registrert alle på måndag, men etter det har det gått strålande. Med besøk av Brann-spelarar og turneringsdag i dag, vert det ei finfin avslutning på tre dagar med mange artige opplevingar, seier Endre Brenne.
Han hadde ansvaret for fotballskulen i lag med Hassan El Fakiri. Sistnemnde var sjuk då lokalavisa var oppom.
Brenne kallar turneringsdagen på Kuventræ for Norway Cup light.
- Ja, her er det full innsats i varmen. Nett som det bruker å vera på Ekeberg i Oslo. For dei eldste har me til og med laga både A- og B-sluttspel, så her skal alle få spela godt med kampar, lovar Brenne.
Fin sommarjobb
I tillegg til ei rekkje talentfulle gute-, junior- og seniorspelarar frå eigen klubb, var også Åsane-spelar Vegard Leikvoll Moberg hanka inn som instruktør denne veka. 24-åringen koste seg.
- Eg får nokre kroner for å hjelpa til. Dette er jo ein kjekk, liten sommarjobb, seier studenten, som etter bortekampen mot Ranheim på måndag også kan ta ein velfortent ferie frå seriefotballen i Obos-ligaen.
- Det er blodig alvor i turneringa for 4.-7. klassingane. Laget eg har ansvaret for kallar seg Liverpool, og dei har ingen planar om å tapa kampar i denne cupen, humrar Vegard.