Betalt parkering utan parkometerangst

Administrasjonen meiner kritikken mot forslaget til det nye parkeringssystemet er heilt feilslått. – Denne løysinga fjernar parkometerangsten og gjev samtidig god rullering i parkeringa, seier medlemmer i adhocutvalet.

Parkeringsutvalet har eksistert i over eitt år, og var i utgangspunktet sett ned for å gjennomføra visjonen om eit nytt p-hus der Osøyro terminal er i dag. Som Os og Fusaposten melde om tidlegare i år har utvalet jobba seg fram til at den plasseringa ikkje er den beste likevel. Samtidig har utvalet bede om utvida mandat – heile parkeringsregimet på Osøyro fell no inn under deira paraply.

Betaling etter to timar

Då utvalet hadde møte på fredag, låg det i bordet eit forslag til parkeringssoner og betalingssystem på Osøyro. Kort samanfatta går det ut på å kjøpa eit system som registrerer alle bilskilt som køyrer inn og ut av sentrumskjernen, og der det tek til å kosta pengar etter to timar. Det same vil vera tilfellet på p-plassen ved Esso-stasjonen og utanfor Oseana. Folk kan anten registrera bankkortet sitt, eller få tilsendt rekning i posten.

På dei andre parkeringsplassane utanfor sentrum – ved Fjellheim, Landboden, Kløvertun, Giskavollen, Peppes og ved Vognhallen – blir det lov å stå i ni timar før betaling inntreffer.

Vidare skal Statens vegvesen sitt prinsipp om shared space vera gjeldande på Osøyro. Det tyder at bilar har vikeplikt for alle mjuke trafikantar, og ei fartsgrense på 20 km/t.

Irriterte over betalingskritikk

I forkant av møtet hadde det vore mykje kritikk i kommentarfelta på Facebook i samband med at det ligg an til å bli betalt parkering på Osøyro. Døme på kommentarar var: ”Ja, jøss, liv i sentrum vil ein ha, så lenge ein ikkje parkerer der”. ”Då handlar me meir på Amfi, og så blir det folketomt på Osøyro”. Nokre nemnde også p-vakta som etter å ha gjeve nokre bøter på 500 kroner til folk som hadde feilparkert i 2012, i det stille vart fjerna att.

– Det er berre negative kommentarar. Folk seier at dei vil aldri ned på Osøyro meir. Me må vera veldig varsame når me innfører dette og syta for at me kommuniserer det tydeleg, sa Paul Hans Sælen, næringslivets representant i utvalet. Politikarane meinte at kritikken ikkje tok høgd for at det nye forslaget nettopp er skreddarsydd for å gje sirkulasjon på Osøyro.

– Dette er ei skikkeleg gladsak. Me lagar eit system der det blir lettare for dei som skal handla på Osøyro å finna parkeringsplass. Det blir også slutt på parkeringsskiva og mange ulike soner. Me lagar livet svært enkelt for alle som skal bruka sentrum, sa utvalsleiar Marie Bruarøy.

Er to timar for kort?

Fleire var inne på at to timar kanskje var i kortaste laget. Sentrumsleiar William Lindborg og Paul Hans Sælen hadde høyrt det frå fleire næringsdrivande i sentrum.

– Skal du først til frisøren, deretter handla, og så få deg ein matbit, er to timar litt kort. Folk står jo ikkje i to eller tre timar for å utnytta gratis parkering. Dei står der så lenge dei har behov, sa Sælen.

Kommunalsjef for samfunnsutvikling, Aina Tjosås, var ikkje einig.

– Har du råd til å bruka 2.000 kroner hjå frisøren har du råd til tre kroner til parkering. På Lagunen er det to timars-parkering, og eg kan ikkje sjå anna enn at det vil fungera på Osøyro også, sa Tjosås.

Gustav Bahus (Frp) nemnde på om det kunne vera eit kompromiss å ha 2,5 time gratis, men andre var einige med Tjosås i at når den første gratistimen vert ultrabillig, fell dei økonomiske motargumenta vekk.

Føreslo 16 kroner timen

Dermed blei det eit viktig poeng kor billig den første timen faktisk skal vera. Rådmann Christian Fotland føreslo 16 kroner. Det vart vist til studieturen utvalet var på til Arendal der dei har hatt stort hell med dette. Der kostar det 17 kroner første timen og 23 kroner andre timen.

– Den store fordelen med dette er at parkometer-angsten forsvinn. Då treng ein ikkje vera redd for bot etter to timar, slik ein kan risikera i dag. Og har du behov for å stå i ni timar, er det langtidsparkering 100 meter lenger borte, poengterte Daniel Skotheim.

– Ja, det er mykje verre å få 500 kroner i bot fordi du var litt sein med å henta bilen. Dette vil bli ei klar forbetring av dagens system, sa Marie Bruarøy.

Korleis ta døgn-syndarane

Etter at politikarane hadde blitt einige om hovudprinsippa, var det ein god del unntak som måtte løftast fram. Blant anna knytt til dei som blir ståande parkert både dag og natt. Administrasjonen la opp til å ha ei ekstra avgift for døgnparkerte bilar. Her var Gustav Bahus ikkje like mildt innstilt.

– Eg trur ikkje det trengst ei eiga avgift for dei som står parkert over natta. Det er nok å ta betalt progressivt. Eit visst beløp etter 4. time, eit nytt beløp etter seks timar og etter åtte timar kostar det 100 kroner per time, sa Bahus.

Her var det mange som meinte at han tok for kraftig i. Nils-Anders Nøttseter meinte at det bør stå noko om dei som står over natta, for å forsikra om at også det blir handtert.

I debatten kom det elles fram at dei som bur i sentrum vil bli kjent att av systemet som fritekne på sine parkeringsplassar.

Føreslår to parkeringshus

Dei endelege løysingane og kva konkret leverandør som vil bli valt, vil bli avklart gjennom ein føreståande anbodsrunde. «Det vil vera opp til tilbodsgjevar å svara på kva for løysingar ein bør velja», heiter det frå administrasjonen.

Vidare frå adhocutvalet heiter det følgjande om parkeringshuset: «Det vert rådd til at det vert bygt p-anlegg på Statoil/Circle K tomta i 2–3 plan med 250 p-plassar eller meir, der det vert dimensjonert for ei eventuell vidareutvikling/bygg på øvste plan – næring og/eller bustad. P-anlegg må òg plasserast og planleggjast slik at eit framtidig mogleg p–anlegg i fjell kan realiserast».

Det vert rådd til at det vert bygt p-anlegg under grusbanen ved Os Ungdomsskule. P-anlegg i dette området vil primært ta unna tilsette i Os Sentrum, komande bebuarar i tilknyting til utvikling av Landboden, og besøkjande i Os Sentrum.

Tidspunkt for anbodsrunde eller kva tid dei to p-husa skal igangsetjast, har adhocutvalet så langt ikkje fastsett.

ol@osogfusa.no