Nils Petter Borge vert ny rådmann i Fusa kommune.
Nils Petter Borge vert ny rådmann i Fusa kommune.

Borge vert rådmann

Torsdag tilsette Fusa kommunestyre Nils Petter Borge (51) som ny rådmann i Fusa kommune.

Borge arbeider for tida som kommunalsjef for helse, omsorg og beredskap i Os.

I vedtaket frå kommunestyret heiter det at Borge vert tilsett som rådmann i ei 100 prosent fast stilling, og at han tek til i stillinga snarast.

Artikkelen held fram under annonsen.

– Om vi klarer å tilsetja rådmann i dag, kan han starta seinast 1. august, sa ordførar Atle Kvåle (Ap) då han bad kommunestyret om å handsama saka sjølv om ho i utgangspunktet ikkje stod på sakslista.

I 2016 sa Berit Fløisand opp stillinga si, etter å ha vore rådmann i Fusa kommune i 23 år. Elisabeth Farstad, som hadde arbeidd som assisterande rådmann i eitt år, vart konstituert som rådmann. Samstundes vart det sett ned eit rekrutteringsutval, beståande av ordførar Atle Kvåle (Ap), Aud-May Boge (H) og Svein Lang (Sp), samt to tillitsvalde, éin frå Fagforbundet og éin frå Utdanningsforbundet, som fekk i oppgåve å starta jakta på ein ny rådmann. Rekrutteringsutvalet fekk bistand frå rekrutteringsbyrået Headvisor.

Ni kandidatar hadde søkt på stillinga då fristen gjekk ut 19. mars. Av desse fleire rådmenn.

I kommunestyret torsdag vart det bestemt at dei politiske representantane i rekrutteringsutvalet får fullmakt til å utarbeida arbeidsavtale, årsløn og andre arbeidsvilkår for den komande rådmann. Det skal òg utarbeidast ein leiaravtale. Forslaget skal godkjennast av Fusa formannskap. Vidare heiter det at rådmannen har seks månaders prøvetid, og at rådmannen vert følgt opp av formannskapet i prøvetida.

Forslaget om å tilsetja Nils Petter Borge som ny rådmann i Fusa kommune, vart samrøystes vedteke. Marianne Borge (Sp) var vara for Peter Hans de Zwarte (Sp) i møtet, men vart kjent ugild då saka skulle handsamast. Haldor Tuft (Sp) kom dermed inn som vara for vararepresentanten.

– Det er ikkje kvar dag vi får høve til å tilsetja ein ny rådmann, sa ordføraren før han banka gjennom saka.