Brei mønstring av lokal kunst i Glasgato

Laurdag er det tid for den årlege fritidsmønstringa i Fusa.

Tema i år er kreativitet og det er invitert til ei brei mønstring av lokal kunst i Glasgato i Kommunetunet. Samstundes er det marknadsdag med Markens grøde på Fjord’n senter. Her kan du òg møta lag og organisasjonar og oppleva underhaldning frå scenen.

Under utstillinga kan du møta lokale kunstnarar, både dei som har kreative syslar som ein hobby og dei som har kunst som levebrød. Mellom anna vil Bente Dankertsen stilla ut og fleire av hennar elevar frå tidlegare målekurs.

Den høgtidlege opninga av Markens grøde og Fritidsmønstringa i senteret vert ved senterleiar Kristian Størksen og underteikna. Kyrkjelydspedagog Norunn Rød Markhus har programmet «Bok og bollar» for born på biblioteket. Ellers vert det smakebitar frå ung Fusa-kultur med dansegruppa Amara G og musikk ved m.a. Frida Solheim frå scenen i Fjord’n senter. Dei er sentrale i jobbinga med UKM i Fusa (Ung kultur møtes).

Det blir òg høve til å vera med på uhøgtidlege konkurransar og aktivitetar i løpet av dagen. Inne på senteret kan du òg møta lokale lag og organisasjonar. Det vil vera ein eigen stand for den ny idrettshallen der du kan koma med forslag til kva hallen skal heita.

Eirik Vangsnes

Kulturleiar