Ei berekraftig oppmoding

På laurdag er det tid for Kleskarusell på Os Barneskule igjen. Berekraftige liv på Os takkar samtidig osingane for to berekraftige år.

Det er to år sidan einengasjert gjeng med osingar samla seg på biblioteket for å diskutera moglegheitene for å etablera ei «Berekraftige liv»-gruppe på Os. Fleire hadde kjennskap til arbeidet som i 2008 starta på Landås då naboar slo seg saman for å finna grøne samfunnsløysingar. Trua på at handling fører til haldning stod i sentrum. Få menneske til å møtast, uhøgtideleg, på ein grøn plattform. Del med naboane dine dei grepa du gjer for å redusera ditt fotavtrykk, så får du andre tips i retur. Det som starta på Landås har vidare slått rot i fleire nabolag kringom i landet, og blant dei er Os.

Dette året har vore spanande for Berekraftige liv på Os. Det er til dømes startaparsellhage på Søfteland, gjenbruksinitiativet «Kleskarusell» fekk gå føre seg midt i Os sentrum med rekordrespons, det har vore god oppslutning på nyttevekstdagar, og vi har vore med på å få samla inn brunsniglar til forsking. Den positive og gode responsen aktivitetane våre har motteke får det grøne hjartet til å veksa! Tusen takk Os!

No rundar året snart over til 2018. Vi går inn i juleførebuingane. Det kjennest som at forbrukarkreftene satsar hardt på å freista oss til å kjøpe den eine gåva meir kosteleg og ressurskrevjande enn den andre. Heimane blir bedne om å velja kva tema dekorasjonane skal ha i år. Klassisk raudt og grønt? Gull? Sølv? Pastellar med glitter? Ja, kvifor ikkje byta ut fjorårets stil med noko heilt nytt? Det er mange val ein kan kjenna seg utsett for i desse tider. Sjølv om vi er overtydde om at forbrukarane i 2017 er opptekne av og opplyst om til dømes gjenbruk, kortreistheit og ressursbruk, vil vi oppmoda til at alle tek eit steg tilbake og tenkjer ein ekstra gong gjennom kva som er naudsynt for å skapa ei fin høgtid.

Tid saman er òg ei fin gåve å gje. Snart står julemarknad for dørene på Os kor ei rekke aktivitetar vert arrangerte som det kan vera kjekt å oppleva saman med vener og familie. I tillegg til moglegheit for å kjøpa lokale og kortreiste varer, kan ein også nytta høvet til delta på årets siste Kleskarusell på Os Barneskule på laurdag. Kanskje du finn julegåver der som ei stund har samla støv i nokon andre sitt skap? På Kleskarusellen betalar du med ein god prat, latter eller eit takk. Vi håpar at klede som elles samlar støv i skap kringom i bygdo finn vegen til Karusellen i tide og at vi får gleda av å slå av ein prat med deg på din berekraftige julehandel.

AvHenriette Kleppe, leiar i Berekraftige Liv på Os