Ein liten sprekk i huset kan vera eit stort problem

Rotter og mus er skadedyra som står for dei største skadane i norske heimar.

Haustkulda kjem. Då trekkjer skadedyra inn. Blant dei er det rotter og mus som utgjer størst trussel for heimen din.

– Gnagarar kan gjera utruleg stor skade. Vi har opplevd at dei har gjort så stor skade at ein ikkje kan bu i huset, og at det luktar pyton frå daude dyr overalt. Vi har også eksempel på brannar som skuldast korslutning fordi rotter har gnaga i sund isolasjonen på elektriske leidningar, seier Therese Nielsen, skadeførebyggjande i Sparebank 1 Forsikring.

Tips til førebyggjande tiltak

Mus og rotter treng minimal opning for å koma seg inn i huset.

– Mus treng ikkje meir enn ein halv centimeter sprekk for å koma seg inn i huset. Rotter treng ikkje meir enn ein centimeter, seier Nielsen.

Dei siste tre åra har Sparebank 1 Forsikring utbetalt over 40 millionar kroner i erstatning i saker kor insekt og dyr er skadeårsak.

Gjennomsnittsskadane er på kring 30.000 kroner ifølgje Sparebank 1 Forsikring, men det skjer også at hus må totalrenoverast for millionar. For å unngå dette er det fleire ting ein kan gjera.

– Ta deg ein god runde i huset og tett igjen sprekkar kor mus og rotter kan koma inn. Nytt samstundes høvet til å halda det ryddig utandørs. Ikkje set matsøppel ute, men syt for at det er tett og kast det rett i restavfallet. Bruk midlar til å tetta, metallnetting og til og med stålull i sprekkar og små opningar. Fugeskum er ikkje å anbefala, seier Nielsen.