– Ein må tenkja på dei som driv butikk i sentrum
Os sentrumsforening og tilsette i kommunen er ute i gata med kaffi, bollar og informasjon om korleis ein skal køyra og parkera i sentrum.
– Det ligg an til å bli ein strålande dag. I dag gjer det i alle fall ikkje noko om ein må gå eit par minutt ekstra for å koma seg til jobb, seier leiar i Os sentrumsforening, William Lindborg.
Må ha god rullering
Då Lindborg parkerte i Vognhallen i 07-tida, var det ingen andre som hadde parkert der.
Artikkelen held fram under annonsen.
– Vi må minna folk på kor dei kan parkera og kor viktig det er at dei som jobbar i sentrum ikkje stel parkeringsplassane til kundane. Eg forstår at ein av og til kan bli freista av å parkera så nærme som mogleg, men ein må tenkja på dei som driv butikk i sentrum, seier Lindborg og legg til:
– Vi har ikkje for mange parkeringsplassar i sentrum, men om vi klarer å få god rullering, så vil det fungera betre.
Fann parkering
Då Os & Fusaposten snakka med Lindborg, kom Gisle Hesjedal bort. Han hadde parkert ved Kløvertun.
– Er det lett å finna parkeringsplass om morgonen?
– Det er meir krevjande no. Eg parkerte på grusplassen så lenge det gjekk, men den blei stengd på fredag. I dag fekk eg plass ved sanitetshuset, men i går måtte eg bort med den gamle symjehallen. Då fekk eg siste parkeringsplassen der. Eg må vera litt tidleg ute, seier Hesjedal.
