Har invitert dronning Sonja til Os
Skulptursymposiet som feirar 20-årsjubileum neste år, kan få storfint besøk.
Os kommune har nemleg sendt invitasjon til Hennar Majestet Dronning Sonja.
- Det gler oss å kunna invitera Kongehuset og Hennar Majestet Dronning Sonja til feiring av 20-årsjubileet for Os internasjonale skulptursymposium. Det har lenge vore Arne Mæland, primus motor for symposiet, sin draum å få dela dette symposiet, dei flotte kunstnarane og osingane si store kunsthending med dronninga, heiter det i invitasjonen.
Artikkelen held fram under annonsen.
Mæland nemnde også dette for dronninga då han var på visitas på Slottet i høve tildelinga av fortenestemedaljen 26. april i år.
Det fyrste symposiet gjekk av stabelen i 1999, og har vore gjentatt anna kvart år sidan. Symposiet driv på dugnadsbasis og utan offentleg støtte. Arrangementet er finansiert ved å selja alle skulpturane på førehand, kjem det fram i invitasjonen.
Det er så langt seld nærare 90 skulpturar på denne måten.
Neste års skulptursymposium vil gå føre seg 24. juni til 6. juli i Vognhallen.
- Vi håpar Kongehuset og Hennar Majestet Dronninga vil vurdera eit besøk til Os neste sommar. Vi lovar at kunstnarane, marmorstøvet som heng over 0s, produksjonen av vakre skulpturar og eit varmt felleskap vil gjera dette til ei unik oppleving, heiter det i avrundinga av invitasjonen.
jostein@osogfusa.no
