annonse

Hobbyfotograf frå Os stiller ut i New York

Aktuell i the big apple
Aktuell i the big apple: Osingen Arne Søvik Larsen sine spesielle bilete vert lagt merke til. Ut denne månaden stiller han ut tre bilete på New York Art Gallery i USA. (Foto: Bo Lehm Nielsen)

– Eg trur ikkje det har gått heilt opp for meg kor stort dette er, seier Arne Søvik Larsen.

Kenneth Svenningsen

Han kjøpte seg kamera alt som liten gut. Oppvaksen på Oshaugen hadde han augo med seg og var stadig på jakt etter å foreviga augneblink.

– Eg har aldri vore ein sånn portrett-fotograf. Eg fell meir for det visuelle i ting, natur, form og farger, seier 58-åringen.

Tilfeldig oppdaga

Fotograferinga har heile vegen berre vore ein hobby, men no byrjar interessa å bli noko meir enn berre «sånn passe».

– Ein må jo tenkja at ein kanskje gjer noko bra når ein vert lagt merke til «over there», seier Larsen.

Via ein person som kikka på «Instagram»-sida hans vart han nemleg spurd om å stilla ut i kunstbyen og metropolen New York.

– Eg har berre tre bidrag på utstillinga, men etter det eg skjønar, er det ei gedigen utstilling. Dei hadde visst 2.500 besøkande på opningsdagen, fortel han.

Arne vedgår at det er spesielt.

– Me fekk ikkje høve til å reisa ned sjølv, men det hadde nok vore ei oppleving. Utstillinga er på New York Art Gallery. Ein rimeleg flott plass, tenkjer eg.

Utstilling i Bergen og Oslo

Her heime held han på med fleire biletseriar. Mellom anna éin kalla Ivar Aasen.

– Det er spesielle bilete. Verkelegheita kan vera kjedeleg, så eg jobbar ein del med bileta i etterkant. Det må til.

Han har elles ein forkjærleik for eldre bilar, scooterar og nostalgiske ting. Mykje av dette går att i bileta.

– Blir det nokre utstillingar her heime med det første?

– Eg skal ha ei utstilling på Vox i Bergen no i desember. Dessutan jobbar eg med ei seperatutstilling i Oslo. Om det går som eg håpar, blir den i februar, slår fotokunstnaren frå Oshaugen fast.

kenneth.svenningsen@osogfusa.no

Klikk for å sjå kommentarar ()

Her kan du fritt koma med synspunkt og informasjon. Me krev fullt namn. Då blir det meir interessant for andre å lesa det du skriv. Trakassering, truslar, hatske meldingar eller reklame er ikkje godteke på osogfusa.no. Falske profiler blir utestengde. Ver sakleg og vis respekt når du kommenterer.

Vil du ha nyheitsbrev frå Os & Fusaposten?

* må fyllast ut