Ingen endringar i barnehagestrukturen
Etter litt fram og tilbake vart posisjonen og opposisjonen samde om at dei kunne vera samde. Det vert ingen endringar i barnehagestrukturen i Fusa.
Camilla Kvamme
camilla.kvamme@osogfusa.no
Artikkelen held fram under annonsen.
I samband med formannskapsmøtet onsdag, hadde rådmann Berit Fløisand bede om ei avklaring knytt til saka om organisering av barnehagar i Fusa kommune.
Men det vart raskt klart at ingen rundt bordet var interesserte i å gjera endringar i barnehagestrukturen i kommunen.
På vegner av Ap, Frp og KrF la Hans Ekeberg (Ap) fram eit fellesframlegg der partia bad rådmannen om å leggja noverande barnehagestruktur til grunn for si vurdering.
Ekeberg bad også rådmannen om å vurdera felles barnehagestyrarar i enkelte geografiske område dersom det viser seg å vera føremålstenleg, både pedagogisk og økonomisk.
Høgre og Senterpartiet føreslo òg at dagens struktur vert vidareført.
- Er dette ei politisk sak? Vi set ikkje i gang utgreiingar dersom det ikkje er trong for det, understreka Mikal Leigland (Sp).
- For KrF er det heilt klart at vi ønskjer å halda fram med den strukturen som er i dag. Det er ikkje meininga å bruka mykje ressursar på å sjå på denne saka, sa Bjarte Samnøy.
- Essensen er at det er ingen rundt bordet som ønskjer å endra dagens struktur. Dermed er eg usikker på om det er naudsynt å dela seg i to leirar, påpeika ordførar Atle Kvåle (Ap) før han la til:
Artikkelen held fram under annonsen.
- Kan vi få lov til å stilla oss bak forslaget til H og Sp? Ja, vel. Då er det samrøystes, sa Kvåle og hamra klubba i bordet.
Av di ingen ønskte endringar i barnehagestrukturen, føreslo Sp og H at SFO-tilbodet i kommunen vert lagt til barnehagane i staden for skulane.
- Skulebussen går når skuledagen er over. SFO varer lengre. Dermed bør SFO-tilbodet vera knytt til barnehagane som er igjen i bygdene. Det vert meir praktisk for foreldra, påpeika Leigland.
Sp-politikaren fekk støtte frå Aud-May Boge (H), medan Bjarte Samnøy (KrF) rista på hovudet.
- Det er mange som har det slik i dag, eg skjønar ikkje problemstillinga, sa han.
Forslaget vart nedstemt med fem mot fire røyster.
