Kostbar overnatting i Os hamn
Båtplassen var utilgjengeleg grunna vêret som har herja, så Adrian Valle måtte leggja båten til kai ved Esso over natta. Då han kom tilbake i dag, oppdaga han at tjuvar hadde vore på ferde.
– Dei har teke to fiskestenger og ei ekstra snelle til ein samla verdi av 10.000 kroner, seier Valle og held fram:
– Så sant det er vêr til det, er eg ute og fiskar. Det er den store hobbyen. Difor har eg investert så mykje i utstyr.
Artikkelen held fram under annonsen.
Overvaking på Esso-stasjonen
Torsdag var Valle i båten fram til klokka 19.00.
– Dei som har stole utstyret har vore her mellom då og i ettermiddag. Dei kan berre ha vore rett innom, for eg har mykje meir utstyr liggjande framme i båten som dei ikkje har teke, seier han.
Då Os & Fusaposten trefte han, var båten på plass på flytebryggja ved bubilparkeringa.
– Det gjekk ikkje an å koma til her i går, for landgangen hadde blitt øydelagt i vêret som har vore den siste tida. Det har vore nokon her og fiksa det no, seier han og legg til:
– No skal eg ut og fiska. Eg har framleis éi stong att.
På Facebook har Valle skrive at dei som har teke fiskestengene har ein time på seg til å koma tilbake med det, elles blir det politimeldt. Ingen har meldt seg, så no blir det sak ut av hendinga.
– Esso-stasjonen har overvakingskamera. Eg håpar at det har fanga opp noko, seier han.
Om nokon har tips i saka, kan de kontakta Os & Fusaposten, så skal vi formidla vidare kontakt.