Lokalt samarbeid skal gje klingande mynt i klubbkassen
Hagavik Hjemmebakeri tok initiativet. Os Fotball elska ideen. No er Os Fotball-brødet lansert.
Då Rema 1000 Kuven feira 10-årsjubileum fredag, var ein delegasjon frå Os Fotball og representantar frå Hagavik Hjemmebakeri på plass for å lansera det nye brødet.
– Sjå her, Tore Kleppe er på brødet, seier ei kvinne Os & Fusaposten passerte på veg inn i butikken.
Artikkelen held fram under annonsen.
Brød-salet gjekk så det suste på første salsdag.
– Vi kjem til å gå tom for brød, seier dagleg leiar i Os Fotball, Endre Brenne.
Sjefssupportaren på brødposen
Etter å ha vore på ein Brann-kamp blei gründer av Hagavik Hjemmebakeri, Arne Arentzen, inspirert.
– Han såg kor engasjerte folk er i fotball, og ville at vi skulle engasjera oss lokalt, fortel dottera Benedicte Arentzen.
Brann-brødet har vore i sal i mange år. No kan ein altså få kjøpt Os-brødet.
– Eg tenkte at det var ein kjempeidé då eg blei kontakta av Hagavik Hjemmebakeri, seier Brenne og held fram:
– Vi har ikkje investert noko i dette prosjektet, men vi får ei krone for kvart brød som blir selt. På baksida av brødposen er det eit skjema som ein kan fylla ut og levera inn på heimekampane våre, og vera med i ulike trekningar.
Brødposen er pryda med sjefssupportar Tore Kleppe, flankert av Mats Cato Moldskred og Vy Nguyen.
