No kjem det digital rutetilvising på bussterminalen i Os

Bussterminalen i Os vert den 12. i bergensområdet som no får digital rutetilvising.

I januar etterlyste Os og Fusaposten digital bussrutevising på Osøyro terminal. Vel ein månad etter er monteringa no i gang.

– Det tek kring ein dag å ferdigmontera kablar, skjerm og anna utstyr. Om alt går som me håpar, vil systemet vera oppe og gå innan eit par dagar, seier montor for SKYSS, Arve Borlaug.

I lag med Rune Leirvåg var han godt i gang i med arbeidet onsdag føremiddag.

– Frå før av har me montert 11 slike rundt i bergensområdet. Dette blir altså den 12., seier montøren.

– Kva informasjon vil busspassasjerane i Os no få?

– Dei vil få vanleg bussruteinformasjon. I tillegg vil dei kunna sjå kvar ein kvar buss er i sanntid, slik at ein veit kor lenge det blir å venta på den og den bussen, forklarer Borlaug.

Raskt levert

Då Os og Fusaposten skreiv om saka i januar, var det med håp i stemmen at journalisten vår etterspurde det nye systemet. årsaka var at det rett og slett var vanskeleg å lesa det opptrykkte rutekartet som heng i glassmonteren på veggen av venterommet.

Pressekontakt i SKYSS, Ingrid Dreyer, lova å sjå på saka, og håpa at terminalen kunne få digital rutevisning innan nokre månadar.

No er det altså på plass, knappe månaden etter at det vart etterspurd.

kenneth.svenningsen@osogfusa.no