Noregs beste i betongfag
Etter treårig allmenn utdanning bestemte Sebastian Hess seg for å bli betongarbeidar. Torsdag vart han noregsmeister i faget.
Osingen byrja som lærling hos Stoltz entreprenør for tre år sidan. I forkant av årets NM i byggfag i Vestlandshallen vart han som einaste representant for Byggopp (Opplæringskontoret for bygg- og anleggsteknikk) teke ut til å forsvara Hordaland fylke i NM-konkurransen.
- Me er svært stolte av det Sebastian presterte, og vel så stolte og nøgde med den opplæringa han ser ut til å ha fått hos Stoltz entreprenør, seier opplæringsleiar ved Byggopp, Johnny Olsen.
Artikkelen held fram under annonsen.
Vrien oppgåve
At Sebastian var einaste representant frå Hordaland, og var vald ut blant 180 betong-lærlingar såg ikkje ut til å plaga ungguten nemneverdig. Osingen presterte nemleg svært godt.
- Dei fekk ei utfordrande oppgåve, som dei skulle bruka tre dagar på. Oppgåva var å laga ei ganske vrien trapp. Sebastian løyste det heile på meisterleg vis og gjekk fullt fortent til topps i konkurransen, fortel Olsen.
