Venar (14) smiler på kommando
– Eg berre gjev han noko godt, så smiler han, seier Marte Kolle (10).
Det var mykje liv på og ved Fjord´n Senter då Markens Grøde og Fritidsmønstringa gjekk av stabelen laurdag. Marte Kolle stod utanfor og venta på at det skulle koma ungar som ønskte å ri på fjordingane Venar og Villa.
– Han vil berre eta, seier Marte, då vi prøvde å ta bilete og Venar «klipte plenen».
Artikkelen held fram under annonsen.
– Han kan faktisk smila på kommando. Sjå her, seier Marte og dreg fram noko knask til fjordingen.
– Såg du det, han smilte litt. Han plar smila endå meir, seier Marte.
– Han ser ganske sterk ut. Har du kontroll på han?
– Ja, eg er sjefen her, seier Marte.
Namn på fleirbrukshallen?
Det er Susann Koldal (26) sine fjordingar. Ho har lært storebroren opp storebroren til Marte, og no er det Marte som blir skulert.
– Vi er i slekt ganske langt ute. Marte har ridd sidan ho var tre år, men det er først dei siste åra ho har gjort alvor av det, seier Koldal.
– Korleis er det å stå her ute i regnet?
– Det er litt surt i dag, men det er kjekt å stilla opp. Hestane klagar ikkje. Då er vi glade også, seier Koldal og smiler.
Artikkelen held fram under annonsen.
I tillegg til å ri, fekk borna helsa på kalvar. Det var også lokale musikalske innslag og dans på tapetet. Aktivitetskoordinator for den nye idrettshallen, Embla Helland, var på plass for å få folk til å koma med forslag til namn på hallen.
– Vi har fått inn nokre forslag både i dag og på e-post. Eg tenkjer at namnet må vera inkluderande og noko som så mange som mogleg kan føla ei kopling til. Eg har min favoritt så langt, men eg kjem ikkje til å seia kva det er, seier ho.
Melkespannhalding
Ordførar Atle Kvåle har også eit namn i tankane til den nye hallen. Heller ikkje han vil dela det med publikum.
– Det eg vil seia, er at det ikkje er naturleg å kalla hallen noko med Fusa. Det er ikkje naturleg. Snart er vi Bjørnafjorden kommune. Då er Fusa eit stadnamn i Bjørnafjorden kommune, og hallen ligg heller ikkje på Fusa.
Kristian Størksen er ny senterleiar på Fjord´n Senter og fekk ta del i arrangementet for første gong. Då Os & Fusaposten skulle prata med han, filma han og sende direkte til Facebook-sida til senteret.
– Det er også viktig for senteret å vera aktive på sosiale medium, seier Størksen og legg til:
– Det er kjekt med slike arrangement fordi det samlar mykje folk. Her er det mykje kvalitetsvarer til sals og det er musikalske innslag. Vi har også melkespannhalding-konkurranse i år. Dei slepp å stå på scenen slik at alle kan sjå dei, seier Størksen og smiler.