Leiinga i Vinnesfestivalen lanserer i år båtcruise frå Os til Vinnesholmen. Therese Teige Nielsen, Rune Bergheim og Werner Skaathun håpar tilbodet vil fengja osingar og folk frå Bergen.
Leiinga i Vinnesfestivalen lanserer i år båtcruise frå Os til Vinnesholmen. Therese Teige Nielsen, Rune Bergheim og Werner Skaathun håpar tilbodet vil fengja osingar og folk frå Bergen.

Vil lokka osingane til Vinnesfestivalen

Tysnesfest har klart det. No håpar Vinnesfestivalen også å lokka osingane til fest over fjorden.

Osøyro:

I sitt niande år som kommersiell musikk- og opplevingsfestival ønskjer folka bak Vinnesfestivalen å samla endå fleire besøkande. Største grepet i så måte, er å setja opp båtcruise frå Os kai til festivalområdet på Vinnes.

Artikkelen held fram under annonsen.

– Det blir standsmessig overfart. Me har tinga inn turistbåten White Lady, og for å gjera det ekstra kjekt skal båten gå nett så roleg at ein rekk ein fin konsert med Håvard Skåtun undervegs, seier festivalsjef Rune Bergheim.

– Er me ekstra heldige, stiller så mange at båten må over å henta osingar to gonger, kommenterer teknisk leiar Werner Skaathun og marknadssjef Therese Teige Nielsen.

Bygd som stiller opp

Trioen har vore primus motorar for festivalen sidan starten i 2009. For årets festival har dei elles med seg økonomiansvarleg Magnus Benson og torgdagansvarleg, Kristin Almås.

– Me er totalt prisgjeven at mange frivillige stiller opp, og på Vinnes er folk klare. I år har me sikkert med oss 80 dugnadsklare sambygdingar, seier Bergheim.

– Ja, Vinnes-folket vil ha denne festen, og dei vil bidra. Når det er klart for festival, så er folket med, seier Skaathun.

– Det er jo sosialt dette også. Ein del jobb, mykje å gjera, men veldig artig. Folk i Vinnes liker å treffast å gjera ting i lag, legg Teige Nielsen til.

For trioen Bergeheim, Skaathun og Teige Nielsen er det ingen tvil om at innsatsen løner seg. På mange måtar.

– Når ein ser det aular av folk på torgdagen, sola skin og folk kosar seg gløgg, det er bonus, smiler Skaathun.

Artikkelen held fram under annonsen.

– Ja, eller når ein legg siste burgaren på grillen laurdag kveld, og ser at dansegolvet framfor scenen vert fylt opp og folk syng av full hals, då er det topp, Då kjenner ein at det me held på med betyr noko, kommenterer festivalsjef Bergheim.

Sankthans-feiring

Festivalen har vakse seg større og større for kvart år som er gått. Utfordringa no framover er å finna passe storleik.

– Hovudmålet vårt er å gje alle aldersgruppar eit eller fleire kjekke tilbod gjennom helga. I år utvidar me festivalen med ein dag for å gje noko ekstra til ungdomen, kommenterer Bergheim.

– Ja, i år tjuvstartar me festivalen med LAN-party i Fusa Samfunnshus. Det vert eit ungdomsarrangement som går ut i dei seine nattetimar. I tillegg får ungdomane fredag kveld sin faste ungdomsdisco i Nesjaheimen, seier Teige Nielsen.

Midt opp i det heile vert det Sankthansfeiring på Vinnesholmen.

– Det blir familiearrangementet fredag kveld. Då vert det gammaldans med bandet som eg spelar i, «3-B», Sankthansbål og grilling i fjøro, seier Bergheim.

Laurdag er det torgdag med ei rekkje stands, barneleikar, bruskasse-stabling og familiekonsert med Eirik Søfteland og Olav Skorpen og hitmakarane i «Innertier».

Liten holme, god plass

Festival-leiinga har ikkje nøyaktige tal på kor mange som har vore samla på holmen dei siste åra, men reknar seg fram til at det truleg var 3.000 innom festivalen i fjor.

Artikkelen held fram under annonsen.

I år håpar dei på endå fleire.

– Det er sjølvsagt ei grense for kor mange som kan vera der på ei og same tid, men me føler me har litt å gå på. Spesielt på «dansen» på laurdagskvelden, seier Bergheim.

– Ja, i fjor hadde me 500-600 inne. men me har nok plass og kapasitet til å ta imot dobbelt så mange, seier Skaathun.

I så måte er Os-offensiven viktig.

– Me håpar osingane ser sitt snitt til å oppleva ein heilt unik og flott festival. White Lady har plass til 100 personar. Me sender han gladeleg att og fram eit par gonger, for å få folket på andre sida av fjorden over, seier Teige Nielsen.

Artistane som entrar scenen laurdag er Eva Weel Skram, Eirik Søfteland og Heine Totland.

Søndag tonar ein litt ned, men musikk og samling blir det like fullt.

– Tradisjonen med arrangement i bedehuset har vore ein suksess frå dag ein. I år avsluttar me festivalen med Fliflet/Kverneberg i bedehuset. Det blir ei flott avslutning på ei lang og innhaldsrik helg, seier festival-trioen.

Artikkelen held fram under annonsen.

kenneth.svenningsen@osogfusa.no