Nytt trimrom på Fusa vidaregåande

Eit treninglokale vil no bli tilgjengeleg både for nybyrjarar og vidarekomne på Leiro.

Rommet ligg i første høgda av skulen. Her finn ein 10 ergometersyklar, avdeling for styrketrening med diverse stasjonære og mobile apparat, tre tredemøller og utstyr for balansekoordinasjon og kjernemuskulatur.

- Eg har vore ansvarleg for innreiing og utstyr. I den samanhengen har eg henta inn tips frå andre vidaregåande skular som allereie har eigne trimrom og samarbeidd med eigne kroppsøvingslærarar. Me har innreidd slik at det blir plass til å kjøpa inn meir, ved behov, fortel avdelingsleiar og assisterande rektor Håvard Ragnhildstveit.

Samarbeidsarena

Utstyret til trimrommet har ein prislapp på 250.000 kroner og har blitt sett i stand gjennom eit godt samarbeid med huseigar. I skuletida blir rommet primært brukt i kroppsøvingstimane, og som eit supplement til elevane på linjene med skiskyting og volleyball. Dei andre av dei 230 elevane, og dei tilsette, vil få ein chip for å koma seg inn utanom opningstida på skulen. For å unngå hærverk er det sett opp overvakingskamera.

- Me er spente på kor mykje dette trimrommet blir brukt. Om det blir ledig kapasitet vil ein sjå på om dette kan gjerast tilgjengeleg for bygda og resten av kommunen, i påvente av ny idrettshall. Det er kjekt med slike samarbeidsarenaer, seier Ragnhildstveit som forøvrig hadde sin siste arbeidsdag i Hordaland fylkeskommune sist fredag. Han er no blitt seksjonsleiar i Samnager kommune med ansvar for kultur, barnehage og skule.