Økland er ny dagleg leiar for Kystsogevekene

Kjell Magnus Økland kom i oktober ut med stor bok om Norges nasjonalbåt, oselvaren. No er han tilsett som ny dagleg leiar i Stiftinga Kystsogevekene.

Det var også Økland som skreiv nominasjonsframlegget som fekk bygging og bruk av oselvaren inn på UNESCOs kulturarvsliste i desember.

- Med sin bakgrunn og sitt nettverk er han rette mann for Kystsogevekene, uttalar styreleiar i stiftinga, Børge Haugetun i ei pressemelding.

Kjell Magnus Økland er oppvaksen på Tysnes og har brei røynsle frå kulturarbeid. Han har vore særleg aktiv i seglsporten og har mellom anna site i styre og stell kring oselvaren i organisasjonar som Båtlaget Njord/Tysnes, Oselvarklubben, BSI/Seiling, Hordaland Seilkrets, Ran Seilforening, Shetland Race og Forbundet Kysten.

- Han har tidlegare arbeidd som journalist og lærar og har drive seglopplæring, arrangert regattaer for både joller, eintypebåtar, havkappsegling og kapproing. Vidare er han ein aktiv regattaseglar, skribent, fotograf og foredragshaldar der han gjerne formidlar maritime tema, heiter det i pressemeldinga.

Kystsogevekene finn stad kvart år i august og september og er eit samarbeid mellom 22 kommunar i Hordaland og Gulen kommune og Hordaland Fylkeskommune. Bak dei ulike arrangementa står ei stor gruppe lokale eldsjeler som er opptekne av eigenart og tradisjonar.

Økland tok til i stillinga 9. januar.