Satsar i sterk veksande bransje

Asbjørn Solholm er mannen bak den nye bubilbutikken i Industrivegen. Osingen satsar på by-bubilar.

- By-bubilar er verkeleg i skotet både her i Noreg og i Europa. Dette er mindre og smart innreia bubilar som er bygd på varebilchassi, fortel Solholm.

Han er hovudleverandør av Pøssl-bubil her i Hordaland. Firmaet eig han i lag med Sola Bobil i Stavanger.

- Me har einerett på svært ettertrakta bubilar. No framover kan det sjå ut til at mitt største problem vert å få henta nok bilar til å ta unna for etterspurnaden, fortel osingen.

God start

Alt like etter opninga har Solholm seld to bubilar. No har han berre tre igjen.

- Eg hentar nye bilar så snart eg kan, men nett no i starten har eg styrt med mykje anna her oppe - pussa opp, lagt til rette utanfor og gjort det litt fint og triveleg for kundane, seier han.

Førebels driv han åleine, men på sikt ser han for seg å tilsetja fleire.

- Det er ein såpass sterkt veksande marknad at eg har verkeleg trua på det. Når eg har halde på litt her, vert det nok bruk både ein og to til, seier Solholm.

No i starten leigar han eit 40 kvadratmeter stort lokal der han har kontor og litt bubil-varar.

- Eg har ein bra avtale med Ole Viggo Skåthun og Brumle Eiendom. Etter kvart er det godt mogleg eg også leigar garasjen ved sidan her til searvice- og lagringsplass.

Synergi-effekt

I tillegg til å selja bubilar vil han etter kvart også byrja å formidla mindre campingvogner.

- Eg reiser snart på ein messe i Düsseldorf. Der skal eg sjå meg ut nokre mindre funksjonelle køyrevogner. Det er liksom det som er litt i skotet for tida. Alt treng ikkje å vera så stort, seier han.

Asbjørn Solholm er ikkje den første som etablerer bubilbutikk i Industrivegen. Tor Egil Myksvoll etablerte sin Bomobil-butikk innafor XL-Bygg for fleire år sidan. Solholm trur ikkje det er ugunstig.

- Me vert jo på ein måte konkurrentar, men samstundes sel me ganske ulike bilar. Generelt set trur eg det er ein fordel at to butikkar av denne typen ligg så nære. Det vil gje synergieffekt. Folk tek lettare turen til Os om dei er interesserte i slike typar bilar. Då har dei to butikkar å stikka innom, meiner Solholm.

Vil stikka seg ut

Men sjølv han meiner at det er positivt med fleire bubilbutikkar i nærleiken har Solholm eit klart ønskje om å skilja seg ut, og bli lagt merke til.

Det originale namnet er eit døme på det.

- Eg valde å kalla firmaet for Petter Pan Bobil og Caravan. Tanken bak det litt uvanlege namnet er å skapa nysgjerrigheit og gjera det enklare for folk å hugsa. Det er nok av bubil-firma i Noreg som heiter Bubil Vest, Aust, Nord, eller liknande. Peter Pan Bobil og Caravan fester seg forhåpentlegvis litt meir, meiner Solholm.