Sei kva du meiner - før det er for seint

Torsdag held Statens vegvesen folkemøte om ferjefri E39. Vi i Folkeaksjonen mot bru over Bjørnafjorden oppmodar alle som er glade i Osbygda, og som bryr seg om korleis vi skal ha det her - om å stilla i Oseana, skriv folkeaksjonen mot bru.

LESARBREV: For det er no vi kan få på bordet kva dette giantprosjektet faktisk kjem til å bety for Os. Til dags dato er det ikkje lagt fram eit einaste konkret prov på kva gode vi kan venta oss - bortsett frå noko vagt prat om klyngeteoriar og kjeda arbeidsmarknader - som om det er sesam sesam for gode, nære og trygge jobbar. Kronargumentet frå veg- og bruforkjemparane har heile tida vore at med litt kortare reisetid, så kjem jobbane til å poppa opp langs heile den såkalla gullkysten. Vel, dei er blitt langt stillare etter kvart som endringar i det som faktisk styrer arbeidsmarknaden - etterspurnad, globalisering og strukturelle forhold - har slått beina under mykje av næringslivet langs kysten.

Vi skal ikkje bruka mykje tid på å repetera kva vi kan venta oss av negative effektar frå vegbygging og bru. Det har vi skrive atskillege spaltemeter om før. Stikkorda talar for seg: Ei skjemmande monsterbru over ein av dei vakraste fjordane på Vestlandet. Full utradering av Kobbavågen; eit av dei flottaste naturområda i Os. Firefelts motorveg i retning Svegatjørn - eit svært folketett område som i tillegg er viktig for barnehagar, skular, idrettsliv, rekreasjon og næring. Ein anleggsperiode som vil kosta dyrt både i areal, øydeleggingar og ikkje minst for dei som skal leva side om side med eit slik massivt maskineri.

Så har dei grelle realitetane også innhenta kostnadssida - trafikkveksten er urealistisk og prisen berre på brua er - alt no - gått i taket.

Viss du som oss, meiner at vi verken treng eller vil ha dette vegprosjektet, så møt opp i Oseana på torsdag og la di røyst høyra. Slik at Os blir ein god stad å veksa opp og å vera - også i framtida!

Styret i folkeaksjonen mot bru over Bjørnafjorden