Sp og H føreslår budsjettretrett

I forslaget sitt til budsjett, har Senterpartiet og Høgre stroke alle innsparingane rådmann Berit Fløisand har budsjettert med som følgje av endringar i skulestrukturen. - Ønsketenking, seier posisjonspartia om forslaget.

Camilla Kvamme

camilla.kvamme@osogfusa.no

Medan opposisjonspartia ser føre seg store endringar i budsjettnotatet som rådmannen presenterte for to veker sidan, er posisjonspartia stort sett nøgde med dei vurderingane som Fløisand og co. har gjort.

- Eg føler at vi peiker på ei ny retning med dette budsjettet. Både budsjett og økonomiplan er i balanse, og det er det ei stund sidan eg har vore med på, sa varaordførar Magne Djuvik (Frp) då han la fram Ap, Frp, KrF og V sitt forslag til budsjett.

Varaordføraren understreka at det har vore ein krevjande budsjettprosess. Men til tross for mange raude tal i starten, er Frp-politikaren nøgd med resultatet.

- Sjølv om vi ikkje er samde med alle prioriteringane rådmannen har gjort, så er budsjettet for 2016 veldig bra, sa Djuvik.

Meir eigedomsskatt

Forslaga posisjonspartia ønskjer å reversera, er ei halvering av budsjettsummen til Fritidsklubben (56.000) og ein reduksjon av tilbodet ved dagsentera for eldre (280.000) og personar med psykiske helseplager (61.000). I tillegg vil partia bruka 80.000 kroner på å behalda kyrkjetransporten til julegudstenester (40.000) og på å auka ramma til Frivilligsentralen (40.000). I sum vert dette 477.000 kroner ekstra, som partia treng inndekking for.

Det klarar ein mellom anna ved å fjerna fritaket frå eigedomsskatt på nye bustadhus. I tillegg til dei 500.000 kronene som rådmannen alt har lagt inn i budsjettet, meiner posisjonspartia det vil vera mogleg å få inn 280.000 kroner ekstra på nybygg.

Forslaget gjekk ikkje upåakta hen på "hi sio" av bordet.

- Eg synest vi bør arbeida med å få fram ei felles forståing av kva det vil seia å auka eigedomsskatten. Eg får heile tida høyra at eg aukar eigedomsskatten, men kva med dei som føreslår å fjerne botnfrådraget og fritaket for nye bustadhus? Kan vi vera samde om at dei også aukar eigedomsskatten? spurte Aud-May Boge.

- Når vi først har innført eigedomsskatt, må alle betala. Det betyr ikkje at dette er ei skatteskjerping, var svaret frå Djuvik.

Fleire lærarar

I motsetnad til posisjonspartia, meinte Svein Lang (Sp) at rådmannen sitt budsjettnotat var altfor defensivt. Lang hadde mange spørsmål til tala i budsjettet, og lurte mellom anna på kvifor helse- og omsorgstenestene Fusa kommune leverer er så mykje dyrare enn andre kommunar sitt tilbod.

Lang ønskte vidare at administrasjonen skulle sjå nærare på innkjøpsrutinane til kommunen. Han meinte òg at det burde utviklast ein næringsstrategi for nyetableringar i Fusa.

- Av verksemdene som vart etablert i perioden 2010-2012, eksisterte under halvparten av dei etter eitt år, fortalte Sp-politikaren som også er styreleiar i Fusa utviklingsselskap.

I Senterpartiet og Høgre sitt budsjettforslag, tek ein vekk alle innsparingane som rådmannen har budsjettert med som følgje av ei endring i skulestrukturen i Fusa. I sum utgjer dette vel 1,5 millionar kroner i 2016.

Opposisjonen ønskjer dessutan - som posisjonen - å behalda kyrkjetransporten, fritidsklubben, og tilbodet ved dei to dagsentera. I tillegg bed Sp og H om at reduksjonen i tilskotet til frivillig sektor vert fjerna (200.000), og at driftstilskotet til rehabilitering/fysioterapi (0,5 årsverk) ikkje vert redusert (100.000).

- Som følgje av at vi ikkje ønskjer å endra skulestrukturen, er det ein god del investeringar som fell bort. Summen som går til å betala renter og avdrag vert dermed vesentleg redusert, påpeika Margunn Y. Samnøy (Sp).

Opposisjonspartia ønskjer i staden å bruka pengar på nye lærararbeidsplassar ved skulane på Holdhus og i Eikelandsosen (2,5 mill. kroner). I tillegg ønskjer partia å setja av 1 mill. kroner til eit forprosjekt i samband med rehabilitering/nybygg på Fusa ungdomsskule.

Tunnel og psykolog

1 mill. kroner er òg sett av til eit forprosjekt knytt til ein tunnel frå Sævareid til Eikelandsosen, medan partia vil bruka 500.000 kroner på oppfølging av eit bustadfelt i Holmefjord.

Samnøy bad òg rådmannen om å undersøkja om det er mogleg å få på plass ei psykologstilling i kommunen innan kort tid. Sp-politikaren peika på at helseminister Bent Høie uansett kom til å lovfesta tilbodet innan 2020, og at det er mogleg å søkja på statlege midlar i samband med opprettinga av stillinga.

- Fleire og fleire barn og unge slit med psykiske helseplager. Vi ønskjer å få på plass dette alt i 2016, sa Samnøy.

- Eit levande dokument

Samnøy vedgjekk at partia ikkje hadde hatt tid til å finrekna på tala. Ho sa òg at Sp og H var opne for ei auke i eigedomsskatten dersom det vart naudsynt.

- Vi ønskjer ikkje berre å få budsjettet i balanse. Vi ønskjer også eit overskot. I så fall kan det verta aktuelt å overføra pengane til undervisingseininga, slik at eininga får høve til å styrkja spesialundervisinga til dømes, sa Samnøy.

Etter presentasjonen av dei to partia sitt budsjettforslag, tok Djuvik ordet.

- Eg høyrte lite om inndekking i forslaget. Det einaste de sa var at de vurderte å auka eigedomsskatten, sa han og la til:

-Korleis kan de levera eit budsjettforslag som fullstendig overser de vedtaket vi nettopp gjorde i skulesaka?

- Vedtaket er ei tilråding til kommunestyret. Hadde det vore eit kommunestyrevedtak, hadde det vore noko heilt anna, repliserte Mikal Leigland (Sp).

Etter eit gruppemøte og litt rekning, konkluderte opposisjonspartia med at dei så og seia var i balanse ved å redusera investeringane, og dermed også rentekostnader og avdrag.

- Reint formelt sett må det likevel handsamast som eit ikkje-saldert budsjett, påpeika ordførar Atle Kvåle (Ap).

Arbeidet med budsjettet held fram til kommunestyremøtet 17. desember. Fusa kommune veit til dømes enno ikkje kva budsjettforliket på Stortinget vil ha å seia for Fusa kommune.

- Budsjettet lever heilt fram til kommunestyret har gjort sitt vedtak i desember, understreka Djuvik.