annonse

Trente med Viking og Sandnes Ulf – valte Lysekloster

Til Lysekloster
Til Lysekloster: Midtbanespelar Rune Johan Åsheim Mo (23) signerer truleg for Lysekloster i dag, og er tenkt som erstattar for Espen Birkeland. (Foto: Marius Nissestad/Grenda)

Rune Johan Åsheim Mo (23) rykte opp til OBOS-ligaen med Nest-Sotra førre sesong. No skal han hjelpa Lysekloster å ta steget opp i 2. divisjon.

Benjamin Søgnen Olsen

– Det ser ut som eg blir klostermann, det gjer det, seier 23-åringen til Grenda, som først melde om overgangen.

I vinter har han trent med både Viking og Sandnes Ulf, men no har han altså valt å spela fotball i Lysefjorden i tida som kjem. Til Grenda seier 23-åringen at det har vore ein stressande vinterperiode.

– Det har vore veldig stressande å måtta avtala alt åleine. Det er det einaste ein går og tenkjer på. Eg kjenner at det skal bli godt å få det avklart og at det er greitt at det blir slik som dette. Det å bli verande i Bergen er veldig fint, seier han.

Midtbanespelaren står oppført med 17 kampar for Nest-Sotra sist sesong. Han skal ha fått tilbod frå dei fleste klubbane i og kring Bergen. I samband med det uttalte han til Grenda i slutten av november at om han skulle bli verande i Hordaland, så ville valet falla på Lysekloster, fordi dei hadde vilkåra som han var mest nøgd med.

– Ein kjempespelar

Sportsleg leiar i Lysekloster Idrettslag, Svein Kollen, stadfestar at Mo så godt som er klar for klubben.

– Vi ser føre oss å signera kontrakten i dag. Han er ein kjempespelar. Alt tidleg i desember fekk vi indikasjonar på at han ville koma til oss. Om han skulle spela for ein klubb i Hordaland, var det berre Lysekloster som var eit alternativ, seier Kollen.

Midtbanespelaren er tenkt som erstattar for Espen Birkeland, som etter tre sesongar, valte å signera for moderklubben Smørås.

– Er det fleire spelarar på veg inn i desse dagar?

– Matos (André Matos, som blei signert i desember journ.mrk.) er på plass. Han kom med fly i natt. Vi ser føre oss å signera to eller tre spelarar til i løpet av månaden, men vi får stadig førespurnader frå spelarar som ønskjer å koma til oss, seier Kollen.

Klikk for å sjå kommentarar ()

Her kan du fritt koma med synspunkt og informasjon. Me krev fullt namn. Då blir det meir interessant for andre å lesa det du skriv. Trakassering, truslar, hatske meldingar eller reklame er ikkje godteke på osogfusa.no. Falske profiler blir utestengde. Ver sakleg og vis respekt når du kommenterer.

Vil du ha nyheitsbrev frå Os & Fusaposten?

* må fyllast ut