Stadfesta klar for Sogndal
Fredag ettermiddag skriv BA at Vegard Leikvoll Moberg no er klar for Sogndal.
Onsdag drog osingen til Sogndal for å sjå på tilhøva og eventuelt koma til semje med Tippeligaklubben på Fosshaugane om ein overgang frå Åsane.
Torsdag var det ein del uvisse om Vegard fekk sjansen til å gå frå Åsane i dette overgangsvindauget.
Artikkelen held fram under annonsen.
- Eg håpar, men eg er redd Åsane ikkje vil la meg gå no, sa 25-åringen til Bergens Tidende torsdag.
I dag ettermiddag ser det imidlertid ut til at ting har ordna seg.
Første sidan Bøyum
«Fredag kom klubbene til enighet om en avtale og Sogndal kjøper fri 25-åringen fra Os», skriv Bergensavisen.
Vegard Leikvoll Moberg vert dermed den første osingen som kjem til å spela Tippeligafotball for Sogndal sidan Geir André Bøyum fekk sine tilmålte minutt tidleg på 2000-talet.
25-åringen vert også, etter det «Os og Fusaposten» kjenner til, første eliteseriespelar frå Os, sidan Bjørn Dahl regjerte på høgrebacken i Brann og var med å vinna seriegull i 2007 og Bjarte Haugsdal hadde sine kampar for same klubb frå 2009-2011.
Ifølgje «Sogn Avis» håpar Sogndal-trenar Eirik Bakke at Vegard vert klar til heimekampen mot Bodø/Glimt søndag.