Bygg norske fartøy ved norske verft!
Dei positive samfunnsmessige ringverknadene for norske lokalsamfunn og underleverandørar ved offentlege byggjeoppdrag til norske verksemder er ikkje vektlagt av styrande politikarar verken i stat eller fylke.
I starten av fellesferien kunne NRK Vestland melde at sidan 2017 har heile 14 nye statlege og fylkeskommunale fartøy blitt bygd i utlandet. Det siste i denne skandalerekka er Vestland fylkeskommune sitt nye opplæringsfartøy «Skulebas», som etter planen skal byggjast i Danmark. Taparane er norske industriarbeidsplassar langs kysten, med topp verftskompetanse, ivrige lærlingar og norske løns- og arbeidsvilkår. Dette skjer både på grunn av dagens offentlege anbodsreglar innafor EØS-avtalen og handlingslamma politikarar både i regjeringa og i fylkeskommunane.
Raudt har både på Stortinget og i Vestland fylkesting utfordra denne politikken, seinast i samband med utflagginga av bygginga av «Skulebas». Samfunnspolitisk og samfunnsøkonomisk er det, etter vårt syn, uakseptabelt og svært kortsiktig å sende slike offentlege oppdrag ut av landet. Dei positive samfunnsmessige ringverknadene for norske lokalsamfunn og underleverandørar ved offentlege byggjeoppdrag til norske verksemder er ikkje vektlagt av styrande politikarar verken i stat eller fylke.
Artikkelen held fram under annonsen.
Etter at det vart kjend at det nye norske havforskningsskipet skulle byggjast i Nederland, medan norske verft vart vraka, reiste vår partileiar Bjørnar Moxnes eit forslag i Stortinget om å stoppe utflagging og subsidielekkasje til utlandet. Dette kan skje ved å endre lov om offentlege innkjøp og oppdrag for å sikre auka aktivitet og sysselsetjing her til lands. Forslaga fekk støtte av Arbeiderpartiet, SV og Senterpartiet. Ved eit nytt stortingsfleirtal, ei ny regjering og mange fleire Raudt-representantar på Stortinget, vil dette forslaget kunne få fleirtal etter valet til hausten. Då vil vi igjen kunne bli herre i eige hus og få slutt på molbo-politikken på dette feltet.
Terje Kollbotn
Helga Holmefjord
Stortingskandidatar for Raudt Hordaland
