Taxi for alle

Om taxisentralen i Fusa trur at alle som bestiller taxi etter kl 18.00, skal ut og drikka vin, så får dei få lov til å tru det.

Eg viser til innlegg frå Fusa Taxisentral samt brev frå samferdselsministeren i Os & Fusaposten.

Om taxisentralen i Fusa trur at alle som bestiller taxi etter kl 18.00, skal ut og drikka vin, så får dei få lov til å tru det. Det er i alle fall synd at alle som treng ein drosje ein kveld eller i helga, på Fusa-sida, ikkje kan bestilla han.

Angåande festen i samfunnshuset med Olav Stedje, er det nok slik at «alle» veit at det ikkje går taxi i helgane, derfor ringjer me ikkje etter taxi.

Det er uansett ikkje min intensjon å foreslå noko som går utover dei svakaste hos oss.

Som samferdselsministeren skriv, er det ein rett for oss alle å kunna bestilla drosje «over hele landet til alle døgnets tider». Då er det samstundes viktig at rammevilkåra er på plass. Dette seier ministeren dei ynskjer å rydda opp i.

Med nye Bjørnafjorden kommune er me stadig optimistar for betre samarbeid over fjorden. Kanskje kan Fusa og Os Taxi samarbeida om køyring i grisgrendte strok?

Der er å håpa på at det ikkje går meir enn «vinter og vår» før taxi blir for alle.

Karl Jakob Helland

Frivillig og optimist