Trist: Dagleg leiar i Nøtteliten barnehage på Søfteland, Ingvild Vevle Chyba, synest det er trist at barnehagen måtte starta tysdagen med å rydda opp og reparera.

Ber om hjelp etter nok eit tilfelle av hærverk

– Hærverk har vore eit gjentakande problem den siste tida.

Det skriv dagleg leiar i Nøtteliten barnehage, Ingvild Vevle Chyba, på Facebook-sida «Søfteland Bygda».

Chyba bed samstundes om hjelp. Hjelp til å spreia informasjonen, og til å skapa ei felles forståing og respekt for barna sitt leikeområde.

Artikkelen held fram under annonsen.

– I Nøtteliten barnehage brukar vi tid og pengar på å ivareta og vidareutvikla barna sitt uteleikeområde. Det er ei glede å sjå at det vert verdsett, både av barnehagebarna og andre utanom opningstid, skriv ho.

Chyba synest det er trist når barnehagen opplever det motsette, som hærverket som fann stad i helga.

– Det har vore eit gjentakande problem den siste tida. Vi har fått melding om ungdomar som er observert på barnehagen sitt område i tidsrommet hærverket må ha skjedd. Det burde vera så mykje anna å bruka kreftene på enn å velta uteborda og benkane våre, øydeleggja hyller, portlås, fallunderlag, hengjelås og brannbilen vår, påpeikar ho.

Vidare skriv Chyba at barnehagen måtte starta tysdagen med å rydda opp og reparera.

– Vi vil ha ein stopp på dette med det same. Forholdet er politimeldt. Politiet er også bedne om å halda området under oppsyn, skriv den daglege leiaren som håpar at ei felles forståing og respekt for området vil bidra til at det ikkje skjer igjen.

Ber om respekt for baran sitt leikeområde: Nøtteliten barnehage ber om hjelp til å spreia ordet og til å skapa ei felles forståing og respekt for barna sitt leikeområde.