Massevaksinering: Både vaksinekoordinator Nina Oen og assisterande kommuneoverlege Jonas Nordvik Dale kan konstatera at vaksineringa går framover.

Desse får korona-stikk i armen i veke 16

Turen er komen til bjørnafjordingar i slutten av 60-åra, og unge med høg risiko.

I neste veke vil 724 personar i prioriteringsgruppe 4 få tilbod om første dose med koronavaksine (BioNTech/Pfizer).

I tillegg vil fleire yngre personar med høgrisikodiagnose få vaksine.

Artikkelen held fram under annonsen.

Prioriteringsgruppe 4 er personar mellom 65 og 74 år, pluss personar mellom 16 og 64 år med sjukdomar eller tilstandar som gir høg risiko for alvorleg forløp.

— Dette betyr at alle som er fødde i 1952, 1953 og 1954 vil få tilbod om å ta koronavaksine onsdag 21. april. I tillegg vil vi i veke 16 gi vaksine til fleire yngre med høgrisikodiagnosane organtransplantasjon, alvorleg immunsvikt, aktiv kreftsjukdom, alvorlege nevro-muskulære tilstandar og kronisk nyresjukdom, seier kommuneoverlege Klaus Melf.

Framleis AstraZeneca-stopp

Vaksineringa med AstraZeneca-vaksinen er som kjent stoppa, og vil ikkje bli starta opp igjen før FHI eventuelt gir klarsignal.

Dette betyr at også vaksinering av kritisk helsepersonell er lagt på is.

Tilbod om vaksine blir sendt ut på SMS.

Dersom du har fastlege i ein annan kommune, vil du anten bli kalla inn til vaksinering av fastlegen din eller av Bjørnafjorden kommune, etter avtale med fastlegen din.

— Du treng ikkje gjera noko. Vent på innkalling, seier kommuneoverlegen.

Vaksinedosar til overs?

Mange lurer på kva som skjer med vaksinedosen dersom nokon ikkje møter opp.

Artikkelen held fram under annonsen.

Nokre kommunar ber innbyggarar som kan vera tilgjengelege på 30 minutts varsel om å registrera seg på ei liste, slik at dei kan bli kalla inn dersom andre ikkje skulle møte opp til timen sin.

— Vi har ikkje ei slik «reserveliste» i Bjørnafjorden. Før kvar vaksinasjonsdag blir dei neste på lista spurde om dei kan vera standby, og det fungerer veldig bra, seier Melf.