– Kan forsikra Søviknes om at me jobbar godt med dette

Ordførar Trine Lindborg har alt kalt inn til gruppeleiar-møte om næringstiltaka i kommunen.

– Det er veldig fint at Terje Søviknes og Frp er samd i dei tiltaka som me i kommunen alt er i gang med, seier Lindborg i sitt svar på lesarbrevet til Søviknes.

Ordføraren fortel at dei har jobba lenge med dei tiltaka som den tidlegare ordføraren viser til.

– I dag tidleg sende eg ut melding til alle gruppeleiarane, inkludert Søviknes, om eit møte der me skal få ei oppdatering på koronasituasjonen, ei oppdatering på vedlikehalds- og investeringsprosjekta i kommunen og eit framlegg til ein næringspakke, fortel Lindborg som kommenterer at ho «nok har ei anna tilnærming til saksgang og forankring enn den tidlegare ordføraren».

– Han legg det fram som om me ikkje er på ballen. Det er me. Men me annonserer ikkje kampresultatet før måla er scora, seier Lindborg og held fram:

– Me er godt i gang med kartlegginga av dei tinga Søviknes tek opp i sitt lesarinnlegg. Både næringssjefen og kommunalsjefen for samfunnsutvikling jobbar godt. Men me må samstundes avventa kva midlar som kjem frå sentralt hald og sjå kva omprioriteringar me kan gjera internt i kommunen. Dei grepa me gjer må ha både forankring og finansiering slik at vi kan bidra med støtte og hjelp til næringslivet.