Mann i 20-åra gripen etter bustadbrann i Os

Sju personar blei evakuerte då det starta å brenna i ein firemannsbustad i Prestegardskogen nyttårsaftan. Ein mann i midten av 20-åra er mistenkt for å ha starta brannen.

Det var klokka 22.40 at det blei meldt om bustadbrann i Prestegardskogen. Politiet og brannvesenet var raskt på staden.

– Det var ingen heime i leilegheita då det starta å brenna, men det var folk heime i dei andre bustadene. Sju personar blei evakuerte. Leilegheita har fått store røyk- og vasskadar, fortel operasjonsleiar i Vest politidistrikt, Knut Dahl Mikkelsen.

Vidare fortel Mikkelsen at eit vindauge var knust og at det ser ut som at nokon har fyrt opp fyrverkeri inn i bustaden. Etterforsking gjorde at politiet starta å søkja etter ein namngjeven mann i 20-åra.

– Kva var det som gjorde at de såg etter denne mannen?

– Det er ein relasjon og ein historie bak, utan at eg vil gå i detalj i dette. Mannen blei funnen på ei adresse i Os kring midnatt, fortel Mikkelsen.

Varabrannsjef Erik Walden fortel at brannvesenet blei varsla «i grevens tid».

– Om vi hadde fått meldinga berre litt seinare, kunne det fort ha vore snakk om bygningsbrann i staden for brann i den eine leilegheita. Det brann i den eine leilegheita oppe. Denne har fått store røyk- og vasskadar. Leilegheita under har fått mindre vasskadar, fortel han.