Osfest har ifølgje politiet gått fint føre seg. Nokre småhendingar må ein rekna med.
Osfest har ifølgje politiet gått fint føre seg. Nokre småhendingar må ein rekna med.

Slik oppsummerer politiet Osfest-helga

– Alt i alt har Osfest gått fint føre seg. Det har vore nokre småhendingar, men det vil det alltid vera i samband med slike arrangement, seier politibetjent Kjetil Hansen.

Tre personar fekk natt til søndag pålegg om å forlata Os sentrum. Alle gjorde som politiet sa.

Den første episoden fann stad klokka 02.36. Ein godt berusa og kverulerande kar i 20-åra fekk beskjed om å avslutta festen og gå heim. Det same skjedde klokka 04.14. Denne gongen var det ein mann i 30-åra som fekk pålegg om å forlata Os sentrum. I mellomtida, klokka 03.50, trefte politipatruljen ein mann i 50-åra, som viste fing til patruljen i det dei køyrde forbi.

Artikkelen held fram under annonsen.

– Mannen vert meldt for forulemping av offentleg tenestemenn, og vart beden om å forlata Os sentrum, noko han, ifølgje loggen, gjorde, opplyser Hansen.

Vidare klokka 04.09 vart det meldt om festbråk frå ein båt i Os hamn. Båtgjestene vart bedne om å dempa seg og å avslutta festen, noko dei ifølgje politiet gjorde.

Trafikkuhell på Lekven

Tidlegare på dagen, klokka 16.39, fekk politiet melding om eit trafikkuhell på Lekven. Politi og brannvesen rykte ut.

– Det var ei som hadde vore uheldig då ho skulle parkera. Det var ingen politisak, seier politibetjenten.

Klokka 1 i natt kom det dessutan melding til politi og brannvesen om eit kommelokk i Industrivegen som på grunn av mykje vatn var byrja å bevega på seg. Meldinga vart sendt vidare til Os kommune.