Tidlegare Os-spelar og drivkraft for utbygginga av Kuventræ på 1970 og 1980-talet er gått bort

Hans Skogen var ein av Os Turnforening sine tidlegare fotballspelarar på A-laget, og drivkraft og arkitekt for store utbyggingsprosjekt på Kuventræ på 1970- og 80-talet.

Hans Skogen (født 24.03 1934), gjekk bort måndag 30. juni.

Hans Skogen (bilete nr. 4 i bakre rekke frå venstre) spelte som regel spiss, eller senter som vi sa den gongen, på A-laget til Os frå slutten av 1950-talet til eit stykke ut på på 60-talet, og var ei viktig brikke på laget då Os vart seriemeister for Sørland/Vestland i 1962. 

Os var to kvalifiseringskampar (som dei tapte) mot Sarpsborg frå å rykka opp i 1. divisjon (elite- serien i dag). Hans spelte ofte saman med broren Magne (nr. 2 i bakre rekke frå venstre), som spelte «indre høyre», teknikaren som var fast straffeskyttar, og kjent for å setta straffene i mål som «markkryparar» heilt inne ved stolpen, eller via stolpen. 

Viktig mann for Kuventræ

Hans Skogen var ein viktig talsmann og pådrivar for å utvikla idrettsanlegget på Kuventræ til eit sentralanlegg for heile kommunen Det viktigaste bidraget som Hans Skogen har hatt for Os Turnforening og for Osbygda elles, var ikkje som fotballspelar, men for arbeidet med å vidareutvikla Kuventræområdet til ein moderne idrettspark for heile kommunen. Det flotte klubbhuset han teikna i 1975 er i typisk «Hans Skogen stil» med bl.a. store vindauge, langt takutstikk og ein stor altan. 

Ei stor oppgradering av klubbhuset er allereie planlagt etter den formidable pengegåva på 3 millionar frå Sparebenken Vest.

Den første idrettshallen i Os (Oshallen) stod klar til bruk i 1983, og vart også teikna av Hans Skogen. Første seriekampen i hallen vart spelt mot «Freidig». Osdamene vann 23–21 med 1.000 supportere i hallen. Hallen vart planlagd med tanke på at eit eventuelt symjeanlegg i framtida også kunne plasserast på Kuventræ. At kommunen i det heile vurderte å byggja symjeanlegget i fjell i sentrum vart vi i turnforeningen, og ikkje minst Hans Skogen, svært forundra over. Planane vart heldigvis skrinlagde etter ein lengre runde med argumentering for å samla dei store anlegga på Kuventræ (både dei kommunale og Os Turn sine). 

Idrettsanlegget har steg for steg blitt utvikla til eit topp moderne idretts- og aktivitetsanlegg for heile kommunen. Hans Skogen hadde stor interesse, og ikkje minst god forståing for korleis vi burde utvikla Kuventræanlegget med dei mogelegheiter og begrensinger som var, bl.a. arealmessig på Kuventræ.

I dag kan vi trygt stadfesta at både dei kommunale anlegga med det flotte Osbadet, og idrettshallane i tillegg til Os Turnforening sitt store idrettsanlegg, har blitt realiserte i tråd med Hans Skogen sine tankar om korleis Kuventræ burde utviklast for framtida. Vi lyser fred over Hans Skogen sitt minne!