Blir det bronse?
Det blei dessverre stortap for dei norske jentene i torsdagens VM-semifinale mot Nederland. No kjempar dei om bronsen.
Då Nederland leia med 121 IMP etter dei tre første setta, bestemte det norske laget seg for å takka for kampen før det siste settet. Det var greit å slappa av litt og etter kvart starta å rette fokuset mot dagens bronsefinale mot Indonesia. Der har Noreg alle moglegheiter. Dei slo Indonesia med 25 IMP i grunnspelet og har dermed med seg ein positiv såkalla carryover til dagens kamp (leier med 11 IMP når kampen startar).
Med blanke ark
Nederland var relativt klare favorittar mot Noreg, så det er inga stor overrasking at sigersmarginen blei såpass stor. Når ein speler knockout og ligg veldig langt bak, kan det bli lett for å bli litt sløve mot slutten når kampen verkar å vera avgjort. Heldigvis startar dei med blanke ark i dag.
Artikkelen held fram under annonsen.
Nederland møter Australia i finalen. Kampen om medaljane startar no klokka 10.
Kaptein for det norske jentelaget, Sven-Olai Høyland, oppsummerer kampen mot Nederland og ser fram i mot bronsefinalen mot Indonesia på følgande vis:
- I dag var vi sjanselause mot Nederland. Dei spelte godt og hadde i tillegg stong inn på ein del spel. Sidan vi låg under med 121 IMPs før siste sesjon, gav vi opp for å sjå framover til bronsekampen. Mot Indonesia startar vi med 11 MPs forsprang. Jentene er lystne på medalje, så eg trur det blir ein jamn kamp der vi dreg lengste strået.
Det er rette innstillinga! La oss håpa Sven-Olai i tillegg til å vera ein god bridgelærer og mentor for jentelaget også er sannspådd. Det ville vore fantastisk om jentene får med seg medalje heim. Lykke til, vi er mange som heiar!
(Teksten er henta frå Kristian Barstad Ellingsen sin VM-blogg)
