Gode tider for iSushi

Det har vore fire gode månader for iSushi i Bjørnegården. No kan dei også servera alkohol utendørs.

30.juni fekk iSushi svaret dei ville ha frå kommunen.

- Alt vi søkte på blei vedtatt og fekk godkjenning. Vi fekk også skjenkeløyve i alkoholgruppe 3, altså over 22%, fortel iSushi-sjef, Roger Johannessen.

No kan dei servera alkohol over 22% frå 13-01.00 utandørs, og dei kan starta alkoholsalet inntil 22% frå klokka elleve.

Salet innandørs blei også forlenga frå eitt til to om natta.

Gjerder ved uteplassen

Søknaden gjaldt i hovudsak det kring 50 kvadratmeter store uteområdet.

- Det er gøy at vi har fått skjenkeløyve på platået utanfor. Saksbehandlaren nemna at vi kanskje måtte ha eit anna rekkverk enn dei taua vi har der no, så det kan henda at vi skal byggja eit fastare rekkverk med plexi-glas, fortel Johannessen.

Avgjerda om uteplassen tar dei fortløpande etter at iSushi-sjefen kjem til Os.

- No har eg nett vore på ferie, så eg skal ta ein tur til Os for å sjå på det. Det må sjå tiltalande ut og vera praktisk, seier Johannessen.

Raskt svar

Det tok ikkje lange tida frå søknaden var sendt til den var vedteke. Det set Johannessen stor pris på.

Kommunen var veldig rask i vendinga igjen. Vi har aldri hatt problem med dei. Dei lever verkeleg opp til slagordet "Os inspirerer". Eg får ikkje gjentatt det nok, skryt iSushi-gründeren.

Om finveret snart finner vegen til Os, så kan det henda at dei får dra nytte av det allereie denne sommaren.

- Uteområdet er veldig vêravhengig, så vi håpar at sola tittar fram snart. Uansett så skal vi få inn elektriske markiser, slik at kundane kan sitta ute sjølv om det regnar litt.

- Over forventning

iSushi i Bjørnegården blei den fyrste skikkelege iSushi-restauranten då den opna i april. Johannessen er godt nøgd med dei fyrste månadane.

- Det har gått betre enn venta. Vi var ikkje sikre på korleis det var å ha ein så stor restaurant i byrjinga, men etter kvart så har vi fått snøballen til å rulla. Kundane har vore nøgde med maten vi har servert, og vi har skapt ein god atmosfære. Nokon har meint at serveringa har teke litt lang tid. Det har vi tatt til etterretning og skal difor no innføra eit nytt serveringskonsept, fortel Johannessen.

Egon-style

Det nye serveringskonseptet til sushi-restauranten skal gjera det enklare og meir effektiv under hektiske periodar.

- Før kom vi rundt til borda for å ta bestilling. No finn kundane seg eit bord, ser på menyen, bestiller i kassen, og tar med seg drikka tilbake. Det blir litt meir Egon-style, seier gründeren.

iSushi er fortsatt fersk i restaurant-bransjen, og Johannessen meiner det er viktig å ta eit skritt om gongen.

- No jobbar vi med å innføre den nye løysinga. Det er ikkje matlaginga som har teke lang tid, det er serveringa som har gjort at ventetida vert litt for lang. Vi valde denne løysinga slik at vi kan halde fram med å ha låge prisar. Med det same serveringskonseptet som før, måtte vi ha økt bemanninga og dermed også blitt nøydd til å auke prisane. Den nye løysninga opnar også for at vi snart kan ta imot bestillingar på nettet og telefon , forklarar Johannessen.

Meir enn berre sushi

Sjølv om iSushi først og fremst er kjend for å laga den japanske fiskeretten, har dei også mykje anna å tilby.

- Det nye vi held på med er kyllingssandwich. Samstundes er det også fleire andre lunsjtilbod på veg. Av middagsrettar har vi blant anna spareribs og biffsteik. Om ein familie har lyst til å koma å eta hos oss, er det viktig at vi kan tilby noko til dei som ikkje vil ha sushi. Vi held også på å auka ølsortimentet, fortel Johannessen.

Loungen flittig brukt

Ved oppstart nemnde iSushi at dei ville ha ein lounge med shuffleboard, storskjermar og sofa- og stolgrupper. No er dei på plass.

- Loungen har vore ein suksess. Om ei større gruppe bestiller mat til eit besøk, så bestiller dei som regel også loungen. Shuffleboardet er flittig brukt, seier Johannessen.

Storskjemane med fotballkampar har det førebels ikkje blitt noko av, men iSushi-gründeren ser ikkje bort i frå at det vil dukka opp.

- Det verkar som at osingane har eit stort engasjement for særleg engelsk fotball. Eg trur interessa er der, men vi må finna ein balansegong, slik at hyl og skrik frå loungen ikkje forstyrrar restauranten, forklarar Johannessen.