Arabisk kulturmøte i Språkkafeen

Tysdag vert det konsert med musikk frå populærkulturen i den arabiske verda i Språkkafeen i Eikelandsosen.

Fusa-kvinna Guro Gjuvsland, som dei siste åra har budd i Libanon, står for programmet saman med veninna Sahar Muhaisen som er palestinar, busett i Bergen. Programmet deira består av dikt og musikk frå den arabiske verda.

For norske øyre er dette framande tonar. For dei som har måtta flykta frå heimlandet er det sterk kost å møta kvardagsmusikken og den heimlege populærmusikken. Musikken som tonar frå radioen ved frukostbordet eller som vert sunge til borna ved sengekanten. Det er også spesielt at det er ei jente frå Fusa som står for denne formidlinga på flytande arabisk.

Vi reknar med at stemninga kjem til å stå i taket og at det kan bli både allsang og spontane innslag frå publikum, slik som sist.

Språkkafeen som er kvar 14.s dag er stadig ein suksess med 30-50 som møter kvar gong. Både gamle og nye fusingar.

Erik Vangsnes

Kulturleiar