Den siste kommunepsykologen knytt til barn og unge, har sagt opp

Utfallet som fleire gonger er varsla om, er blitt ein realitet.

— Det er ikkje dermed sagt at vi kjem til å stå utan kommunepsykolog til barn og unge. Vi går umiddelbart i gang med utlysing av stillinga, seier leiar for familiens hus, Linda Hevrøy.

I tenesteutvalet i slutten av januar, spurte Jo Rune Ugulen Kristiansen (Ap) Hevrøy om dei har merka konsekvensane av budsjettet som er vedteke. Eitt av kutta som skulle gjennomførast, var å ta bort éin av de i to kommunepsykologane knytt til barn og unge og psykisk helse i Familiens hus.

— Kommunepsykologane har sagt at om det vert éin psykolog att, så ønskjer ikkje dei å halda fram, sa Hevrøy då.

Dei visste at det kunne gå den vegen, og no har siste attverande psykolog sagt opp.

— Det skjedde nyleg. Vi har nokre månader på oss til å rekruttera ein ny, grunna oppseiingstid. Vi får håpa at vi lukkast med det, seier Hevrøy.

Før det blei vedteke å kutta ein kommunepsykolog, stod Bjørnafjorden kommune med totalt tre kommunepsykologar.

To under området oppvekst, i Familiens hus, og éin under området helse.

Lukkast ikkje kommunen å rekruttera til ledig stilling i Familiens hus, står altså kommunen utan kommunepsykolog knytt til barn og unge si psykiske helse.