Lysekloster-trenaren meiner Os har tidenes sjanse. Brenne ser poenget

— Eg er med på at det er ei langt meir open avdeling enn det me har hatt på lenge, men det blir ingen «walk in the park».

Seriestarten nærmar seg og Os må finna seg i å vera blant opprykkskandidatane. Det meiner i alle fall Lysekloster-trenar Ruben Hetlevik.

— Eg meiner dei har tiårets sjanse til å rykkja opp i år. Borte er alle tidlegare Post Nord-lag (2. divisjonslag) og ressurssterke klubbar som det har vore vanskeleg å konkurrera mot. No står kampen mellom klassiske 3. divisjonslag. Her meiner eg at dei bør satsa å gå for det, slår Hetlevik fast.

Han minner om at laget har vore blant dei fire beste i si avdeling dei to siste åra, i konkurranse med tradisjonsrike, sterke klubbar som normalt er å finna på høgare nivå.

— Sjølv hadde me sterke lag som Brann 2 og Vard-Haugesund å stri med nokre år. No er me oppe i tillegg, og dermed er Os kvitt oss også, konstaterer Hetlevik.

Kjekk avdeling

Os-trenar Endre Brenne ler lett når han høyrer Hetleviks kommentarar om Os sine opprykkssjansar.

— Ja, han seier vel det. Eg skjønar kva han meiner, og eg kan gje han rett i at det er ei langt meir open avdeling enn på mange år, seier Brenne og legg til:

— Dei siste sesongane har me kjempa mot ganske klare opprykksfavorittar - lag som Lyn, Brann 2 og nettopp Lysekloster. I år er det mange lag som kan vera med og kjempa i toppen.

Laga Os møter er Askøy, Bjarg, Djerv 1919, Fana, Frøya, Førde, Florø, Haugesund 2, Loddefjord, Sandviken, Stord, Årdal og Åsane 2.

— Ei veldig kjekk avdeling. Det blir færre lange reiser, og fleire av laga me skal møta kjenner me godt, seier Os-trenaren.

— Kva er målet før årets sesong?

— Å forbetra oss både spelemessig og tabellmessig. Me vil vera med og slåst heilt i toppen.

Sist Os var i 2. divisjon i det norske seriesystemet var i 2010.

Søkjer forsvarar

Brenne trur Djerv 1919 og Bjarg vert sterke.

— Det har spelt ein del treningskampar. Korleis står de så langt?

— Me har slått Austevoll 8-2, tapt 5-2 for Sandviken, slått Vard-Haugesund 5-2 og tapt 1-0 for Gneist. I den siste kampen stilte me med nokre A-lagsspelarar og nokre Os 2-spelarar, fortel han.

Han karakteriserer oppkøyringa så langt som ok.

– Grunna treningsleiren vår har me ikkje spelt så mange treningskampar som me har ønskt. No jobbar me med å få ein motstandar til neste laurdag.

— Og stallen?

— Me spelar med tre stopparar og ønskjer oss ein stoppar til. Elles ser det veldig bra ut, konstaterer Brenne.