Vil dobla talet på direkteruter mellom Os og Fusa: Bruarøy bed ordførarane om å ta mykje Møllers tran før møtet med Skyss

Innanfor det ein kan definera som normaltid for arbeidsreiser, meiner fellesnemnda det bør vera direkteruter mellom Osøyro og Eikelandsosen minst éin gong i timen, i begge retningar.

Med samanslåinga av dei to kommunane vert FV 552, frå Osøyro til Eikelandsosen, ein endå meir sentral transportåre, og ein særs viktig kollektivakse, ikkje berre internt i Bjørnafjorden, men også vidare til Bergen og etter kvart også Lyseparken.

I strategidokumentet for Bjørnafjorden heiter det at kommunen skal arbeida for å redusera transportbehovet og leggja til rette for miljøvenlege transportformer som kollektiv, sykling og gåing.

– Skal ein få innbyggjarar og tilsette til å redusrea eigen bilbruk til eit minimum er effektive kollektivløysingar og gode gang- og sykkelvegar nøkkelen, går det fram av startegidokumentet.

Utvida tilbod i helgane

I dag er det berre to direkteruter mellom Osøyro og Eikelandsosen i tidsrommet 06.00–09.00 og 14.00–17.00. Mellom Eikelandsosen og Osøyro er det tre.

12. april skal ordførarane i Os og Fusa, Terje Søviknes (Frp) og Atle Kvåle (Ap), i dialogmøte med Skyss. Tema for møtet er kollektivtilbodet i den nye kommunne, og 25. mars vedtok fellesnemnda at ein vil be om fem nye direkteruter mellom Osøyro og Eikelandsosen, i tillegg til dei som finst i dag, og to nye direkteruter mellom Eikelandsosen og Osøyro.

Fellesnemnda bed også Skyss om å sikra utvida opningstid for ferjesambandet Hatvik-Venjaneset, spesielt om morgonen på kvardagar og på kveldstid i helgane.

– Om ein tenkjer at innbyggjarane våre skal få høve til å ta del i lags- og organisasjonsliv på begge sider av fjorden, må det vera mogleg å kryssa fjorden så seint som mogleg, spesielt i helgame, sa Søviknes i møtet.

Mykje Møllers tran

– Opningstidene på ferjene er eviktige for oss. Slik stoda er i dag, er tilbodet til å leva med på kvardagar. Laurdagen derimot må vi sjå litt meir på, sa Kvåle.

I oktober 2016 vart det klart at Fjord 1 er vinnar av fylkeskommunen og Skyss sin anbodskonkurranse for sju ferjesamband i fylket, deriblant Hatvik–Venjaneset. I det nye ferjeanbodet er det føreslått å knappa litt ned på opningstidene på ferja. Det meiner politikarane er særdeles uheldig.

– Vi er nøydd til å behalda avgangen klokka 05.35 (frå Venjaneset) på grunn av næringslivet, la Kvåle til.

Mikal leigland (Sp) er blant dei som nyttar avgangen klokka halv seks frå tid til anna. I fellesnemnda argumenterte han for at avgangen er viktig for å få varer ut i marknaden, og inn til produksjon, samt for arbeidstakarar som jobbar i bergensområdet og startar dagen klokka 7.

– Dette må vi slåss for, sa han.

Marie Lunde Bruraøy (H) meiner det er bekymringsfullt at fylket legg opp til ein reduksjon i tilbodet, både når det gjeld buss og ferje, og ba dei to ordførarne om å ta mykje Møllers tran i forkant av møtet med Skyss.

– Vi kan ikkje akseptera eit dårlegare tilbod enn det vi har i dag. Det vert ikkej nullvekst i personbiltrefikke n dersom alle er avhengige av å setja seg i bilen for å koma seg nokon plass, understreka ho.

camilla.kvamme@osogfusa.no