Svegatjørn-Rådal vil bli 1,4 milliardar kroner dyrare enn fyrst antatt - dette er årsakene
Regjeringa legg opp til å vidareføra bygginga av prosjektet med ei monaleg auke i prognosen.
Prosjektet omfattar bygging av om lag 16 kilometer firefelts veg i ny trasé vest for Fjøsanger. Prosjektet omfattar også utbetring av Nesttun- og Hopstunnelane på E39.
Prognosen for sluttkostnad er no om lag 9.250 millionar kroner. Det inneber ein auke på 1.375 millionar kroner samanlikna med styringsramma og om lag 730 millionar kroner høgare enn kostnadsramma.
Artikkelen held fram under annonsen.
Kostnadsauken kjem i hovudsak av uventa kostnader på tetting av steindeponi, handtering av store mengder forureinande massar i tunnelane og store mengder infiserte jordmassar, skriv departementet.
Samferdselsdepartementet legg til grunn ei kostnadsramme for prosjektet på 9.200 millionar 2020-kroner. Rekna om til 2021-prisnivå foreslår Samferdselsdepartementet at kostnadsramma blir auka til 9.458 millionar kroner.
Vidarefører Rogfast
Regjeringa tar også sikte på å vidareføra utbygginga av Rogfast neste år, trass i at den eksterne kvalitetssikringa av prosjektfinansieringa enno ikkje ligg føre.
– Det er planlagt å bruka midlar til å vidareføra utbygginga av E39 Rogfast i Rogaland, skriv Samferdsledepartementet i forslaget sitt til samferdslebudsjett i 2021.
Anleggsarbeida på Rogfast, som er det første prosjektet i pakken ferjefri E39, starta i januar 2018. I konkurransen for den første av dei tre store tunnelkontraktane i prosjektet var det einaste tilbodet vesentleg høgare enn forventa. Basert på den marknadsprisen ville kostnadene i prosjektet ha overstige kostnadsramma, og konkurransen blei derfor avlyst av Statens vegvesen.
Statens vegvesen gjennomførte så gjennomgang av prosjektet, der kostnadssparande tiltak, gjennomføringsstrategi, samfunnsøkonomi og føresetnader for finansieringsopplegget blei vurdert på nytt.
I desse dagar blir det gjennomført ei ekstern kvalitetssikring av finansieringsopplegget. Samferdselsdepartementet opplyser i budsjettet at dei vil komme tilbake til Stortinget etter at den eksterne kvalitetssikringa er gjennomført.
