Styrtregn i vente: No skal vassmagasina fyllast
Det er meldt styrtregn over Vestlandet torsdag, men det spørst om det får nokon konsekvensar for straumprisen.
Meteorologisk institutt melder styrtregn i Vestland fylke i morgon (torsdag). På det meste er det venta inntil 15 mm nedbør i timen.
At det skal regna mykje, er me godt vane med på Vestlandet.
Artikkelen held fram under annonsen.
— No kan de i alle høve trøysta dykk med at vassmagasina blir fylte opp. Spesielt i ytre strøk vil det regna kraftig og lenge, seier meteorolog Julie Solvsik Vågane.
Bjørnafjorden kan gå klar nokre av dei verste bygene.
— Det blir aller verst nord for Bergen. Sør for Bergen kjem dei kraftigaste bygene i ytre strøk. I indre strøk, som i gamle Fusa kommune, vil det truleg bli ein meir normal nedbørsdag, seier Vågane.
Lys i tunnelen
I løpet av torsdag og fredag kan det koma opp imot 80 mm regn på enkelte plassar i fylket. Frå fredag ettermiddag vil det roa seg.
— Då får me inn ein heilt annan vêrtype. Ut på fredagen blir det opphald og til dels pent vêr. Slik blir det også gjennom helga, fortel Vågane.
— Sommarvêr igjen?
— Nja. Det blir fint, opphald og til dels sol, men hausten er i anmarsj. Med nordvestlig vind blir det kaldare luftdrag. Truleg vil temperaturen liggja kring 15 gradar gjennom helga, seier meteorologen.