– Desse elevane bidreg positivt til verksemdene på eit mykje tidlegare stadium enn andre
Det seier NITO-president Trond Markussen etter å ha besøkt Fusa vidaregåande skule denne veka.
Måndag var NITO-presidenten først på besøk hjå Framo Fusa. Deretter gjekk turen til Fusa vidaregåande skule. Litt av føremålet med besøket var å få ei innføring i det gode arbeidet skulen gjer med TAF/YSK-elevane sine. Mange av dei har læretida si på Framo.
– Ingeniørar med praktisk erfaring, er dei beste ingeniørane, seier Markussen og utdjupar:
Artikkelen held fram under annonsen.
– Mange av dei som vert utdanna til ingeniørar, startar læretida si i det dei byrjar i jobb. Elevane som har gått TAF, og som har både fagbrev og studiekompetanse, bidreg positivt til verksemdene på eit mykje tidlegare stadium.
NITO-presidenten hadde rett og slett teke turen til Eikelandsosen for å skryta av den jobben som vert gjort. Med seg hadde han regionsjef i NITO Vest, Stian Nyhus, leiar i NITO Hordaland, Guro Fjellhaug og bedriftsgrupperådgjevar i NITO Vest, Lars-Petter Jevnaker.
– Det er fantastisk flott å sjå den jobben som vert gjort, seier Markussen og understrekar at ein er avhengig av at både skule og industri er villig til å satsa på ordninga.
– Ordninga har ein pris, også for næringslivet, men det er ei investering i framtida, påpeikar han.
Norges ingeniør- og teknologorganisasjon (NITO)
• NITO er Noregs største organisasjon for ingeniørar og teknologar. Organisasjonen har 100.000 medlemmer.
• NITO har 19 lokale avdelingar rundt om kring i Noreg. Berre i NITO Hordaland finst det 12.000 medlemmer.
• Organisasjonen har 1.400 bedriftsgrupper, og er ifølgje nettsida deira ein politisk uavhengig, frittståande fagorganisasjon.
– Ei ordning som må bevarast
Fusa vidaregåande skule starta med TAF-ordninga, som no har skifta namn til YSK (yrkes- og studiekompetanse) i 2001. Dei første åra var ordninga retta mot teknologi- og industrifag (TIF), men i 2004 utvida dei ordninga med TAF Marin og i 2007, TAF Helse.
Frå 2019 kunne elevane på restaurant og matfag også velja YSK-ordninga, og frå hausten 2021 vart automasjon det siste tilskotet til ordninga.
– På Framo har halvparten av medlemene våre gått TAF, påpeika delegasjonen frå NITO då dei kom til Fusa vidaregåande skule måndag.
Artikkelen held fram under annonsen.
– Dette er ei ordning som må bevarast. Det er vårt bodskap, understreka rektor Inger-Elin Epland og assisterande rektor Haldis Gjøen Solvang før lærar Ole Christian Dale gjekk i gang med presentasjonen av modellen.
– Elevane har fire års jobberfaring før dei startar på utdanningsløpet sitt. Dei kan mykje meir, og forstår faget mykje betre enn studentane som berre har studiekompetanse. TAF-elevane endar ofte opp som mentorar for dei andre studentane, påpeika Dale.
– Det var berre å gripa sjansen
Ein rapport Menon har utarbeidd for NITO, syner at behovet for ingeniørar vil auka kraftig i alle næringar i Noreg fram mot 2030. Spesielt innan bransjar som havvind og batteriproduksjon er etterspurnaden stor.
– Rapporten syner tydeleg at det hastar med å utdanna fleire ingeniørar. Her bidreg Fusa vidaregåande skule på ein god måte gjennom sine TAF-liner. Mange av elevane på mekanisk, marin og automasjon tek etter kvart ingeniørutdanning, påpeikar regionsjef i NITO Vest, Stian Nyhus, i ein e-post til avisa.
Om det vert ingeniørutdanning på Anders Askvik Brattetveit, veit han ikkje enno. Han er elev på TAF Mekanisk, eller TIF, og arbeider to dagar i veka på Framo Fusa.
– Eg har eitt og eit halvt år igjen av skuletida på Fusa vidaregåande. Eg har ikkje bestemt eg for kva eg vil gjera etter det. Kanskje vert det eit år i militæret, fortel han.
Brattetveit hadde ein kompis som søkte på TAF, og bestemte seg for å gjera det same.
– Eg hadde høyrt at Fusa vidaregåande var ein veldig bra skule.
Artikkelen held fram under annonsen.
I dag er han stornøgd med valet han tok i 2020.
– Det var berre å gripa sjansen. Eg har ikkje sett meg attende éin einaste gong, seier han med eit smil.