Alle mann til pumpene. Lange køar ved bensinstasjon
Bilistane stod i kø onsdag.
16,99 for diesel og 17,99 for bensin lydde opningstilbodet på den nye automatstasjonen til Haltbakk Express på Røykenes.
Frå klokka 10.00 onsdag stod bilistane i kø for å nytta seg av det gode tilbodet.
Artikkelen held fram under annonsen.
I fjor sommar stengde Erling Andersen butikkdelen i bensinstasjonen på Røykenes. Eit par månadar etter var det også stopp for drivstoff-tilbodet på stasjonen.
No er det altså nok ein gong mogleg å fylla fossilt drivstoff på Røykenes.
— Tilbodet har vore tilgjengeleg nokre veker, men det er først i dag me har offisiell opning - med brus, kaffi og bollar, fortel Nina Andersen.
Erling blir tilsynsmann
Huseigar Erling Andersen var sjølv oppteken med å hjelpa folk med automaten, men Os & Fusaposten fekk ein prat med salssjef i Haltbakk Express, Tor Veland.
— Me er svært glade for å få til dette samarbeidet med Erling og familien hans. Her har det altså vore bensinstasjon i ein mannsalder. Då syntest me det var leit at det skulle stoppa heilt opp, seier Veland.
Han var i kontakt med Andersen i oktober då YX-stasjonen la ned.
– Etter kvart fann me ut at denne plassen passar Haltbakk Express perfekt, fortel Veland.
Han presiserer at selskapet er oppteken av å halda liv i bygdene.
Artikkelen held fram under annonsen.
— Me ønskjer meir næring til Søfteland og at bebuarar her skal få behalda tilboda, fortel Veland.
— Det er automatpumper, dette, men de skal ha Erling Andersen med dykk?
— Ja, Erling blir oppsynsmann på denne stasjonen. Han kjem også til å jobba litt vidare med oss med tanke på oppstart andre stader, seier Veland.