Fusingen Turid Sværen stiller ut i Oseana
Turid Sværen si interesse for tekstil som materiale går heilt tilbake til barndommen og tida som løpejente på Irisfabrikken.
– Vi er svært glade for å kunna presentera ei eventyrleg utstilling med den lokalt baserte tekstilkunstnaren Turid Sværen, seier kunstkurator Evelyn Holm ved Oseana i ei pressemelding.
Utstillinga STING opnar i Hvelvet laurdag 29. februar.
Artikkelen held fram under annonsen.
Utstillar Turid Sværen er fødd og oppvaksen i Fusa, men bur og arbeider i Os, med atelier i den gamle stasjonsbygninga ved Os stasjon. Sværen gjekk ut med ein bachelor frå Kunsthøgskolen i Bergen i 2004, og har markert seg med utstillingar i regionen, blant anna separatutstillingar ved Solstrand Hotel & Bad i 2003 og Galleri Frøya i Kalvåg i 2016.
Ved sida av arbeidet i atelieret, jobbar ho som miljøterapeut ved Vartun oppfølgingssenter.
Frå utstillingsteksten heiter det at «Turid Sværen si interesse for tekstil som materiale, og kanskje spesielt potensialet i sytråden, går heilt tilbake til barndommen. Spesielt legg ho vekt på tida der ho som ung var løpejente på Irisfabrikken på Os, og henta trådsneller og andre ting syerskene hadde bruk for. (...) Dei tekstile verka gjev assosiasjonar til planteteksturar som mose, lauv, lav og skog, men også vatn og hav. I det ein entrar utstillinga og bevegar seg gjennom installasjonen, kan ein oppleva det heile som ei vandring i lys og skugge».
