Hesvik stiller ut i Norheimsund
Galleri Puls i Norheimsund startar utstillingsåret laurdag med Strandvik-kunstnar Anne Hesvik.
Anne Hesvik stiller ut hustavler og måleri, medan Randi Sandven Skeie frå Norheimsund stiller ut foto.
Under opninga laurdag vil kunsthistorikar og prest Helge Unneland halda innleiingsføredraget «Med skriften på veggen» som handlar om nettopp hustavler.
Artikkelen held fram under annonsen.
Klassiske målingstradisjonar
Anne Hesvik fortel at arbeidet hennar som kunstnar byggjer på dei klassiske målingstradisjonane. Inspirert av dei gamle europeiske og norske meistrane, arbeider ho som kolorist.
- Fargar som er tonar, ornamentikken, den tause tale og kjærleik for tradisjonar er det berande i mitt formspråk, seier Hesvik.
I samarbeid med Unneland har ho måla hustavler med sitat frå både tradisjonelle bibeltekstar og dikt frå ulike forfattarar.
På utstillinga i Galleri Puls viser ho måleri i ulike oljeteknikkar på linlerret og treplater. Ho har også såkalla Giclee-trykk innramma med passepartout både med og utan ramme. Giclee-trykk er digitale trykk som gjengjev maleri og andre verk i svært høg kvalitet.
- Komposisjonane er heilt mine egne, men inneheld likevel dei gamle grunnprinsippa i det gamle faget, rytmen, linjespelet, linjeføringa, forklarer Hesvik.
Ny komposisjon
Hesvik fortel at det er viktig at kvart einskild verk vert bygd opp som eit måleri, fyrst med ei grunnbehandling av treformene, deretter ei grunning med krittlim eller oljemåling.
- Målinga til grunninga lagar eg sjølv etter gamle oppskrifter og eg brukar dei gamle klassiske måleteknikkane.
Overflata vert oppbygd av fleire tynne sjikt med transparent måling. Underfargane er oftast ljose med mørkare transparente lag over.
Artikkelen held fram under annonsen.
- Eg byggjer opp ny komposisjon for kvart einskild verk. Inspirasjon til arbeida hentar eg frå naturen og frå poesien. Rytmen og linjespelet i ornamentikken hentar eg gjennom musikken.
