Komande brannmenn-brødre

Brørne Matthias og Erik Folkestad var vanskelege å få ut av brannbilen på Strandvikmarknaden. Dei unge gutane veit nemleg kva dei skal bli når dei blir store.

- Eg blir vel ståande her litt utover dagen, eg no, skjemtar pappa Gustav.

Hans to søner på fire og tre år såg ikkje ut til å villa vera med på andre aktivitetar denne dagen.

- Det er lastebilar, politibilar og brannbilar som tel. Tidlegare har dei fått sjå brannbilen i Eikelandsosen. I dag køyrde me til Strandvik for å kikka meir, humrar pappaen.

På direkte spørsmål om kva dei skal bli når dei blir stor, svara gutane slik:

- Brannmann

- Ja, eller politimann.

- Ja, for det må visst bli noko av dei to tinga. Dei ramsar til og med opp nummera til alle naudetatane medan dei leikar, fortel pappa.

Heime i Eikelandsosen har mora til og med sydd klede til gutane.

- Ho har brukt mykje tid på det. Men dei vart godt nøgde då ho gav dei heimelaga brann-drakter som dei kan bruka når dei leiker, ler pappa Gustav.

Lange køar

Det var mykje folk og god stemning frå tidleg på dag i sommarbygda Strandvik laurdag. Då «Os og Fusaposten» kom inn, var dei fleste ferdige å eta frukost i grendahuset. Neste på programmet, var for mange det store høgdepunktet: Sal av rauddravle.

- Åh, dette har me venta på heilt sidan i fjor. Ingenting er som nylaga rauddravle frå Strandvik. Då kjem barndomsminnene på meg med ein gong, sa ein eldre mann med salig blikk like etter å ha fått si etterlengta forsyning.

Men nok til alle var det truleg ikkje.

- Me har laga godt over 50 liter, men av erfaring bruker ikkje det å vera nok. Dessverre har me ikkje korkje tid eller kapasitet til å laga meir. Det er berre å beklaga, sa dravle-konene Britt Sagen og Irene Tveit.

Dei to byrja å jobba med Dravlen alt onsdag.

- Det er ein tung fysisk jobb, så me har i alle høve fått trimmen vår for veka, humra dravle-damene.

Då dei køyrde inn bøttene med dravle, var køen utanfor grendahuset over 20 meter lang.

Tungrock-stand

På markndaden var køane elles fint fordelt mellom dei mange standa som stod lina opp på skuleplassen. Alt frå tretønner til kunst, sminke, båtar, bilar og mat var å kjøpa, og mykje av produkta som var utstilt var lokalt. Til og med ein stand for Fusa-tungrock.

- Me må ut og visa oss, me også, seier Stian Smørholm.

Han er eigar av eit lokalt plateselskap på Fusa som fremjar lokale heltar. Selskapet er kalla «Egded Circle Productions».

- Fusa har alltid hatt tradisjonar for å ha band innan tungmusikken. På slutten av 1980-talet  var det ein bra gjeng som heldt på med heavy metall. I dag er det ein ny gjeng som har vakse fram - ein gjeng på 8-10 gutar som no hevdar seg godt innan tung undergrunnsmusikk.

Blant banda han frontar er Inculter, Sepulcher, Reptilian og Dead To This World.

- Korleis vert de tekne imot her i Strandvik?

- Jo, greitt. Det er ikkje alle som heilt veit kva me driv med, men fleire er nysgjerrige, og det bør dei vera, for det banda våre gjer har sett spor etter seg i Noreg, så vel som internasjonalt, seier Smørholm.

Bygdapris

Utover dagen i Fusa var det stadig fleire leiker og konkurransar som vart sett i gang. Både hønsedritebingoen og andesleppet i Vikaelva samla mange deltakarar. Vidare vart det delt ut bygdapris til Tone Vik og arrangert ei rekkje mindre konsertar i grendahuset og kyrkja. Meir av dette kan du sjå på «Os&FusaTV» til veka.