Med øl på menyen

Laurdag er det øl på menyen, og berre bittelitt attåt i Oseana. Ølfestivalen vert runda av med kåringa av dagens heimebrygg.

Dei byrja å bryggja på ideen i fjor haust. Laurdag er Oseana Ølfestival eit faktum. Målet er å bli ein verdig veslebror til den litt større Bergen Ølfestival.

- Det er på tide at Os får sin eigen ølfestival. Me har lagt opp til eit breitt program med ølsmaking, matservering,føredrag knytt til ølbrygging og ein liten heimebryggjings-konkurranse mot slutten, seier arrangementssjef i Oseana, Berit Steen.

26 deltakarar

26 bryggarar eller bryggelag er klare for heimebryggkonkurransen. Dette er altså berre for amatørar.

- Me har fått stor respons på denne konkurransen. Deltakarane har alt sendt inn brygget sitt, og vert i desse dagar prøvesmakt av vår jury leidd av Tarjei Skei frå Os, fortel Berit Steen.

Vidare fortel ho at det vert tre føredrag.

- Først vert det eit føredrag av Gahr Smith-Gahrsen, som er bryggerimaster for 7 Fjell, deretter fortel Stian Krog litt om ølfestivalen i Bergen, før Hugo Ivan Hatland fortel litt om boka si «Den Norske Ølrevolusjonen», fortel Steen.

Elles vil eitt stort og åtte mikrobryggeri vera representerte i Oseana. Det store er Hansa Borg. Dei mindre er 7 Fjell, Lysefjorden, Kinn, Voss, Balder, Ægir, Baran, Waldemars og Nøgne Ø.