«Mitt nabolag» i Torsdagsakademiet

I Fusa folkebibliotek er Torsdagsakademiet tilbake med ein ny sesong i bibliotekslokala i Eikelandsosen. Det startar med ei reise til fjerne strøk torsdag.

Den norske fiolinisten, fotografen og historieforteljaren Christian Stejskal skal ta publikum med på si reise frå Wien til Aksum i Etiopia og sitt opphald hos zabaleenarane i «Garbage city» i Kairo. Det blir ei eineståande multimediaforteljing i ord, bilete og musikk.

«Mitt nabolag» er ei forteljing om pilegrimsferda som gjekk føre seg til fots, frå fødebyen Wien, via Jerusalem og til den heilage byen Aksum i Nord-Etiopia. Undervegs på denne reisa møtte Stejskal zabaleenarane, Kairo sine uoffisielle, kristne, søppelarbeidarar i «Garbage City».

Ei fargerik og personleg reise

Då pilegrimsferda var over, flytta Stejskal inn i denne søppelbyen, der han budde saman med zabaleenarane medan han livnærte seg som fiolinist ved operaen i Kairo. I programmet blir publikum tatt med på ei fargerik og personleg reise der vi får sju forteljingar om sju ulike lagnader frå søppelbyen. Rikt illustrert med fotografi og eit lydbilete av Christian Stejskal sjølv, der han framfører både arabisk musikk og eigne komposisjonar på fiolin. Stejskal har synt programmet mange stadar i verda og er for tida på turné i Hordaland.

Vårprogrammet

Neste kveld i vårprogrammet, torsdag 22. februar, reiser vi til meir heimlege trakter når Olli Lilletvedt kjem for å læra fusingane meir om bringedukar frå Hardanger.

Gruppa Smooth Operators frå Osterøy står for vårens musikalske innslag onsdag 7. mars, med si blanding av konsert og kåseri om Bob Dylan og 60-tallet.

Vårsesongen vert avslutta 26. april med eit «festspill-vorspiel». Dette er eit arrangement som peikar mot Festspillene i Bergen og deira urpremiere av stykket «Andvake», basert på den prisvinnande trilogien til Jon Fosse.

Arrangør Fusa folkebibliotek

Erik Vangsnes

Kulturleiar