Opnar hausten med kolteikningskunst

Laurdag opnar haustsesongen i Galleri Hvelvet på Oseana. Først ut er teiknaren og skulptøren Arne Ingvaldsen.

Sesongen i hvelvet starter altså med utstilling av kolteikningsarbeidet til Arne Ingavaldsen. I samband med opninga no laurdag, vert det også kunstnarsamtale med Arne Ingvaldsen og Arvid Pettersen.

Utstillar Ingvaldsen er utdanna ved arkitektavdelinga på NTH i Trondheim og ved kunstakademiet i Warzawa og Bergen. Som kunstnar jobbar han mest med installasjonar, skulpturar og teikning.

Fødd i Os

Ingvaldsen vart fødd i 1947 og budde dei første åra av sitt liv i Os. Trass i dette, er det første gong han no har ustilling i si tidlegare heimbygd.

71-åringen har utført fleire offentlege kunstverk, mellom anna i Oslo, på Hamar, i Kristansand og i Bergen. Han har hatt fleire utstillingar i Noreg og i utlandet – mellom anna i Portugal og Slovakia.

Nærleik og tredimensjonalt

Dei siste åra har kunstnaren jobba mest med kolteikning. Om utstillinga han tek med seg til galleriet i Oseana, seier han dette:

– Eg viser eit utval av teikningar med kol på papir. Nokre i form av korte seriar og andre som enkeltståande arbeid. I teikningane søkjer eg å koma nær eit uttrykk av noko som er konkret, utan at det blir ei avfotografering eller ei form for naturalisme. Teikningane mine kan gje inntrykk av noko tredimensjonalt og handgripeleg, samstundes som dei forblir reine grafiske objekt, seier Arne Ingvaldsen.

kenneth.svenningsen@osogfusa.no